Anjuna News: हणजूण- वागातोरच्या किनारी भागात बेकायदेशीरपणे उभारण्यात आलेली बांधकामे पाडण्याचे, सील करण्याचे आदेश मुंबई उच्च न्यायालयाच्या गोवा खंडपीठाने दिल्यानंतर अशी बांधकामे करणाऱ्यांचे धाबे दणाणले आहेत.

हणजूण पंचायत क्षेत्रातील किनाऱ्यावरील विकास प्रतिबंधित तसेच सीआरझेड परिसरातील बेकायदा 175 बांधकामे सील करण्याचे निर्देश खंडपीठाने दिल्यानंतर स्थानिक पंचायत व गटविकास अधिकाऱ्यांनी संबंधित आस्थापनांना टाळे ठोकण्याची प्रक्रिया सुरू केली आहे.

सोमवारी हणजूण-वागातोर परिसरातील 18 बेकायदेशीर बांधकामे सील करण्यात अली असून उच्च न्यायालयाच्या आदेशानुसार अनधिकृत बांधकामांचा प्रश्न सोडवण्यासाठी पंचायत मंडळ, उत्तर गोवा बीडीओ आणि हणजूण पोलीस कर्मचाऱ्यांच्या नेतृत्वाखाली ही कारवाई करण्यात आलीय. आतापर्यंत एकूण 43 बांधकामे सील करण्यात आली आहेत.

तीन दिवसांपूर्वी हणजूणमधील अनिल मडगावकर यांच्या मालकीच्या ले गाला रिसॉर्टमधील बेकायदा बांधकाम प्रशासनाने जमीनदोस्त केले होते.

बांधकाम नियमांचे वारंवार उल्लंघन केल्याप्रकरणी या रिसॉर्टवर अधिकाऱ्यांनी ही कारवाई करण्यात आली होती.

विनापरवाना व्यवसाय

न्यायालयात सुनावणीवेळी तब्बल 175 आस्थापनांनी कोणत्याही प्रशासकीय यंत्रणेकडून रितसर परवानगी न घेता व्यवसाय सुरू ठेवल्याचे निदर्शनास आले होते.

त्यामुळे या आस्थापनांसह बांधकामांना तात्काळ टाळे ठोकण्याचे निर्देश न्यायालयाने हणजूण पंचायत तसेच गटविकास अधिकाऱ्यांना दिले होते.