शिवोली: म्हापसा शहरात शनिवार (दि. १५ फेब्रुवारी) संध्याकाळपासून 108 क्रमांकाची अत्यावश्यक रुग्णवाहिका बंद पडली आहे. म्हापसा-शिवोली गृहनिर्माण मंडळाच्या रस्त्यावर ही रुग्णवाहिका नादुरुस्त झाली असून, अद्याप तिची दुरुस्ती करण्यात आलेली नाही आणि यामुळे नागरिकांमध्ये मोठी चिंता पसरली आहे. याआधीच म्हापसा जिल्हा रुग्णालयात रुग्णवाहिकांची कमतरता आहे, त्यात ही घटना घडल्याने परिस्थिती अधिक गंभीर झाली आहे.

एखाद्या विद्यार्थ्यांची तब्येत बिघडल्यास किंवा अपघात झाल्यास तातडीने वैद्यकीय मदत कशी मिळवायची, असा प्रश्न नागरिकांना पडला आहे. रुग्णवाहिका दुरुस्त करण्यास होत असलेल्या विलंबाबद्दल नागरिकांनी नाराजी व्यक्त केली आहे. प्रशासनाने या प्रकरणी तातडीने लक्ष घालून रुग्णवाहिका सेवा पूर्ववत करावी, अशी मागणी जोर धरत आहे. अत्यावश्यक सेवा पुरवण्यात हलगर्जीपणा झाला तर त्याचे गंभीर परिणाम भोगावे लागतील, असा इशाराही नागरिकांनी दिला आहे.

म्हापसा जिल्हा रुग्नालयात रुग्णवाहिकेची कमतरता भासत आहे, तसेच या हॉस्पिटलमध्ये अनेक रुग्नावाहिका नादुरुस्त अवस्थेत आहेत. हळदोण येथे देखील १० ते १५ रुग्णवाहिका बिघडलेल्या आढळतात. या रुग्णवाहिकेंची जर का डागडुजी केली तर नागरिकांपर्यंत उत्तम सेवा पोहोचवता येऊ शकते. संबंधित अधिकाऱ्यांनी या बिघडलेल्या अवस्थेतील रुग्णवाहिकांकडे लक्ष द्यावे आणि आवश्यक बदल करून पुन्हा सेवेत रुजू करावी अशी मागणी केली जात आहे.

स्थानिकांनी दिलेल्या माहितीनुसार, शिवोलीत म्हणावी तशी रुग्णवाहिकेची सोय उपलब्ध नाही. त्यांना शेजारच्या भागांमधून रुग्णवाहिकेची मदत घ्यावी लागते. लवकरात-लवकर शिवोली हेल्थ सेंटरला एक रुग्णवाहिका द्यावी, तसेच राज्यात असलेली रुग्णवाहिकेची कमतरता भरून काढण्यासाठी नादुरुस्त अवस्थेत असलेल्या रुग्णवाहिकांची दुरुस्ती करावी अशी मागणी आरोग्यमंत्री विश्वजीत राणे यांच्याकडे करण्यात आली आहे.