पणजी (Panjim) : नुकताच राज्यभर रस्ते सुरक्षा सप्ताह साजरा करण्यात आला. पण, या काळातच सर्वाधिक अपघात घडल्याचे (Goa Accident) दिसून येते. खड्ड्यांची समस्याच अपघातांना कारणीभूत ठरत असून खड्डेमुक्त राज्याची मुख्यमंत्र्यांची घोषणा हवेत विरल्याने प्रवाशांचा जीव कवडीमोल ठरला आहे.

अपघात रोखण्यासाठी वाहतूक खात्याकडून प्रयत्न केले जात असले तरी खड्ड्यांमुळे तसेच वाहनचालकांचे वेगावर नियंत्रण नसल्यामुळे अपघातांची संख्या दिवसेंदिवस वाढत चालली आहे. गेल्या महिनाभरात राज्यात 15 हून अधिक अपघात झाले असून यामध्ये सहा जण ठार तर 25 जण जखमी झाले आहेत. अपघातांचे हे सत्र सुरूच असून त्यावर नियंत्रण आणण्यात प्रादेशिक वाहतूक खाते आणि वाहतूक पोलिसांना अपयश आले आहे.

अद्यापही खड्ड्यांचेच साम्राज्य : राज्यात बहुतेक सर्वच रस्त्यांवर खड्डे पडले आहेत. त्यामुळे अपघाताच्या घटना नेहमीच्याच बनल्या आहेत. खड्डे चुकविताना इतर वाहनांना धडकून वाहनचालकांना जीव गमवावा लागत आहे. मुख्यमंत्री आणि साबांखा मंत्र्यांनी 1 नोव्हेंबरपर्यंत रस्ते खड्डेमुक्त करण्याची घोषणा केली होती. ती हवेत विरली अाहे.

महिन्यातील दुर्घटना

भोम येथे फोंडा-पणजी महामार्गावर अज्ञात वाहनाच्या धडकेत एकाचे निधन

बोरीत ट्रक कलंडून चालक जखमी

सांगोल्डात ट्रक उलटून चालक जखमी

डिचोलीत दुचाकीला वाहनाची धडक : दुचाकीस्वार जखमी

पांजरखणी येथे दुचाकीवरून पडून फ्रेंक्लिना फर्नांडिस यांचा मृत्यू

गोमेकॉसमोर रुग्णवाहिकेने ट्रकला धडक दिल्याने रुग्णाचा मृत्यू

गिरी-म्हापसा येथे बस-दुचाकी अपघातात एक ठार

भिरोंडा येथे कदंब-टेम्पो ट्रॅव्हलर धडक, 13 प्रवासी जखमी.

चेतन लक्केबैलकर