Goa Accidents Case : गोव्यातील रस्ते अपघातात दिवसेंदिवस वाढ होते. वाहतूक नियमांचे उल्लंघन केल्याप्रकरणी पोलीस वाहनचालकांवर कारवाईत करत दंड वसूल करत आहेत. डिचोली-साखळी रस्त्यावर विजयनगर-कारापूर येथे वीज खांब मोडून मोटारगाडी ओहोळात कोसळल्याची धक्कादायक घटना घडली आहे. या भयानक अपघातात कारचालक सुदैवाने सुखरूप बचावला.

मोटारगाडीचा मात्र चक्काचूर झाला. हा अपघात काल (सोमवारी) मध्यरात्री 12 वाजण्याच्या सुमारास घडला. अपघातात सुखरूप बचावलेला युवक पोलीस खात्यात सेवेत असल्याची माहिती मिळाली आहे. मोटारगाडीने प्रथम वीज खांबाला धडक दिली. नंतर ती जाऊन ओहोळात कोसळली. माहितीनुसार, चालकाला झोप लागली आणि त्याचे गाडीवरील नियंत्रण सुटून हा अपघात घडला.

दरम्यान, तब्बल 2 कोटी किमतीची सुपरकार Nissan GTR आणि मारुती कारचा भीषण अपघात झाला आहे. बोरी-वेर्णा रस्त्यावर स्पोर्ट्स कारचालकाचे नियंत्रण सुटल्याने कारची मारुती ओमनीला आणि स्कूटरला जोरदार धडक बसली. या दुर्घटनेत दोघेजण जखमी झाले असून त्यांना त्वरित रुग्णालयात हलवण्यात आले आहे. अपघातात तिन्ही गाड्यांचे नुकसान झाले आहे.