वास्को : इंडियन ऑइल अदानी गॅस प्रायव्हेट लिमिटेडने वास्कोचे आमदार कृष्णा दाजी साळकर यांच्या उपस्थितीत पाइपद्वारे नैसर्गिक वायू पुरवठ्याच्या कामाचे उद्घाटन केले. याप्रसंगी कदंब महामंडळाचे चेअरमन दीपक नाईक, नगरसेविका शमी साळकर, नगरसेवक गिरीश बोरकर, इंडियन ऑइल अदानी गॅस प्रायव्हेट लिमिटेडचे प्रकल्प व्यवस्थापक सचिन पठारे व इतर अधिकारी उपस्थित होते.

येथील हॉटेल रुक्मिणी जवळ सदर कामाचा शुभारंभ वास्कोचे आमदार (MLA) कृष्णा साळकर यांच्या हस्ते करण्यात आला. यावेळी बोलताना आमदार साळकर म्हणाले की वास्को वासियांना पाइपद्वारे नैसर्गिक वायू पुरवठा होणार याचा मला आनंद होत आहे. कारण या सुविधेमुळे लोकांचा त्रास कमी होणार आहे.

गॅस (gas) बुक करून सिलेंडर घरपोच होईपर्यंत वाट बघत राहणे, अचानक सिलेंडर संपला तर होणारी धावपळ कमी होणार. तसेच गॅसचा दर बघितला तर 40 टक्के कमी दरात गॅस उपलब्ध होणार असल्याचे ते म्हणाले. प्रकल्प व्यवस्थापक सचिन पठारे यांनी गॅस पाईपलाईनद्वारे गॅस सप्लाय सुरक्षित आहे. ईकनॉमिकल तसेच 24×7 याचा सप्लाय होणार आहे. झुआरीनगरमध्ये सीएनजी, कुठ्ठाळी, बिर्लामध्ये चालू झाल्याचे ते म्हणाले. लोकांना बऱ्यापैकी सर्विस देण्याचा आमचा प्रयत्न चालू असल्याचे ते म्हणाले.