पणजी : भारतातील मोजक्याच वैद्यकीय महाविद्यालयांमध्ये (Medical colleges) समावेश असलेल्या गोवा वैद्यकीय महाविद्यालय (GMC) बांबोळीच्या समोर बेकायदेशीरपणे कचऱ्याच्या (Garbage) ढिगाऱ्यावर उभारण्यात आलेले गाडे आज प्रशासनाने हटवले. त्यामुळे राष्ट्रीय हमरस्ता बांधकामाला वाट मोकळी झालीस. त्याच बरोबर गोमेकॉसमोर (GMC) जे गलिच्छ चित्र दिसत होते व वाहतुकीला अडथळा ठरत होती. तो देखील नाहीसा झाला. त्यामुळे सर्वसामान्य नागरिकांनी प्रशासनाच्या या कारवाईचे स्वागत केलेले आहे.

मात्र काही राजकीय पक्ष आणि त्यांचे नेते बेकायदेशीर गाडे हटवण्याच्या प्रकरणाचाही राजकीय फायदा उठवण्यासाठी या कारवाईला विरोध करतानाही दिसत आहेत. 2002 साली माजी मुख्यमंत्री मनोहर पर्रीकर यांनी या परिसरात फक्त पाच गाडे दिन दयाळा रोजगार योजनेअंतर्गत येथील स्थानिकांना दिले होते. मात्र त्यानंतर हळूहळू येथे जवळ जवळ दोनशे गाडे रस्त्याच्या दोन्ही बाजूला, अडचणीच्या ठिकाणी उभे राहिले. स्थानिक लोकप्रतिनिधी व आमदार यांचे अभय लागल्यामुळे या गाड्यांची संख्या हळूहळू वाढतच गेली.

त्यामध्ये स्थानिकाबरोबरच परप्रांतीय नागरिकांनीही गाडे उभारले होते .अनेक वेळा या गाड्याविरुद्ध कारवाई करण्याचे निर्देश दिले गेले. मात्र लोकप्रतिनिधीच्या हस्तक्षेपामुळे ही कारवाई रहीत होत गेली.शेवटी आज सकाळी जिल्हाधिकाऱ्यांच्या आदेशानुसार येथील गाडे हटवण्यात आले आणि परिसर स्वच्छ करण्यात आला. सरकारने या गाडे चालकांना इतरत्र पुनर्वसन करण्याचे आश्वासन यापूर्वीच दिले आहे. त्यामुळे सरकारने त्वरीत आमचे पुनर्वसन करावे अशी मागणी गाडे चालकांनी केली आहे.