मडगाव: रुमडामळ येथे पंचायतीतर्फे कचरा संकलन केले जाते ते व्‍यवस्‍थित होत नसल्‍याचा आरोप करत रुमडामळचे पंच सदस्‍य विनायक वळवईकर यांनी आज रस्‍त्‍यावरील कचरा आणून सरपंच मुबिना फणिबंद यांच्‍या केबिनमध्‍ये टाकला.

साचून राहिलेल्‍या कचऱ्याची घाण कशी येते याची कल्‍पना सरपंचांना यावी यासाठी आपण ही कृती केल्‍याचे वळवईकर यांनी सांगितले. दरम्यान, याप्रकरणी पंचायतीने पोलिसांत तक्रार दाखल केली आहे.

वळवईकर यांनी केलेल्‍या दाव्‍याप्रमाणे रुमडामळ येथील काही भागात मागचे चार-पाच दिवस कचऱ्याचे संकलन केलेले नाही. त्‍यामुळे कचरा साचून सगळीकडे दुर्गंधी पसरली हाेती. या समस्‍येकडे सरपंचांचे लक्ष वेधले. मात्र, त्‍यांनी त्‍याकडे काहीच लक्ष दिले नाही. यामुळेच आपल्‍याला ही कृती करावी लागली, असे त्‍यांनी सांगितले.