डिचोली: चतुर्थी जवळ आल्याने सध्या सर्वत्र या सणाची तयारी जोरात सुरू झाली आहे. डिचोलीतील सर्व चित्रशाळांमध्ये सध्या लगबग सुरू असून, मूर्तिकार रात्री जागवू लागले आहेत. कुंभारवाडा-बोर्डे येथील एका चित्रशाळेत तर ज्येष्ठ म्हणजेच तब्बल ८४ वर्षांचे मूर्तिकार रमाकांत शेटकर हेही सध्या गणेशमूर्ती रंगविण्याच्या कामात मग्न आहेत.

रमाकांत शेटकर हे पणजोबापासूनची मूर्तिकलेची परंपरा सांभाळून आहेत. त्यांच्या चित्रशाळेतील गणपतीच्या मूर्तींना आजही मागणी आहे. वयाच्या दहाव्या वर्षांपासून आपणाला गणपती मूर्तिकलेची आवड निर्माण झाली आणि हळूहळू आपण या कलेत झोकून दिले.

पणजोबा, आजोबा आणि वडिलांनंतर आपण मूर्ती कलेची परंपरा चालूच ठेवली आहे. वयोमानाचा विचार करता, पूर्वीप्रमाणे शरीर साथ देत नाही. तरीही अंगातील कलाकार स्वस्थ बसू देत नाही. असे रमाकांत शेटकर यांनी सांगितले.

‘पीओपी’ बंद व्हावी!

गेल्या काही वर्षांपासून प्लास्टर ऑफ पॅरीसच्या मूर्तींचे आक्रमण वाढत आहे. त्यामुळे पारंपरिक मूर्तिकारांना त्याचा मोठा फटका बसत आहे. ‘पीओपी’च्या मूर्ती वेळीच बंद झाल्या नाहीत, तर पारंपरिक मातीकला आणि चित्रशाळा नामशेष होणार, अशी खंत रमाकांत शेटकर यांनी व्यक्त केली.

नव्यांना प्रशिक्षण मिळावे!

गेल्या काही वर्षांपासून मूर्तिकारांसमोर चिकण मातीची समस्या निर्माण झाली आहे. पूर्वीप्रमाणे आता चिकण माती उपलब्ध होत नाही, अशी खंत रमाकांत शेटकर यांनी व्यक्त करुन, मूर्तिकला टिकवून ठेवण्यासाठी आजच्या पिढीला प्रशिक्षण देणारी एखादी चित्रशाळा सुरू करावी, अशी मागणीही केली आहे.