Ganesh Chaturthi 2023 Goa: मोठ्या भक्तिभावाने व उत्साहात होणाऱ्या चतुर्थी उत्सवानिमित्त गोव्याच्या कानाकोपऱ्यातून म्हापशात गणेश चतुर्थीला लागणाऱ्या साहित्याच्या खरेदीसाठी बाजारात लोक येतात. चतुर्थीच्या पार्श्वभूमीवर म्हपसा बाजारात मोठी उलाढाल पाहायला मिळाली. लोकांना विविध वस्तूंची भरघोस खरेदी केली.

महिलांनी चतुर्थी निमित्त घरात विविध प्रकारची मिठाई तयार करायला सुरुवात केली आहे. त्याचेही साहित्य बाजारात उपलब्ध आहे. विविध दुकानांत सजावटीसाठी लागणारी सामुग्री, माळा, हार,माटोळीला बांधण्यात येणारी सामुग्री (लाकडी फळे आदी), मखर सजावटीसाठी लागणारे सामान विक्रीला उपलब्ध आहे.

शहरातील विविध मिठाई दुकानांवरही ग्राहकांची गर्दी दिसत आहे. विविध प्रकारचे मोदक आणि इतर मिठाई मोठ्या प्रमाणात विकली जात असल्याचे दिसून येते.

वाहन, इलेक्ट्रीक वस्तूंच्या खरेदीला उधाण

सणासुदीच्या काळात नव्या वस्तू खरेदी करण्याची प्रथा देशात आहे. चतुर्थीच्या निमित्ताने अनेकांनी वाहन, इलेक्ट्रीक वस्तूंच्या खरेदीला पसंती दिली. दुचाकी, चारचाकी वाहनांच्या विविध शोरुममध्ये खरेदीसाठी ग्राहकांची लगबग पाहायला मिळाली.