Ganesh Chaturthi 2023 : कुंभारवाडा मये येथील शशिकांत अर्जुन गावकर यांचे कुटूंब गेल्या 4 पिढ्यांपासून चिकण मातीच्या पर्यावरणपूरक गणेशमूर्ती बनविण्याच्या व्यवसायात असून ही पारंपरिक कला जोपासणारे शशिकांत हे चौथ्या पिढीतील असून गेल्या 60 वर्षांपासून ते या व्यवसायात आहेत.

शशिकांत यांनी ही कला त्यांचे वडील अर्जुन यांच्यापासून घेतली तर आज त्यांचे सुपुत्र अर्जुन त्यांना गणेशमूर्ती बनविण्याच्या कामात मदत करीत आहेत.

दरवर्षी सुमारे १७५-२०० शुध्द चिकण मातीच्या गणेशमूर्तीं बनविण्याचे उद्दिष्ट साध्य करण्यासाठी वडील आणि मुलगा अहोरात्र मेहनत घेतात.

यावर्षी दोघांनी मिळून आतापर्यंत सुमारे १५० च्या आसपास मूर्ती तयार केल्या असून आपले लक्ष्य पूर्ण करण्यासाठी काही मोजक्या मूर्ती त्यांना बनवायच्या आहेत.

कुंभारवाड्यातील 50 कुटुंबे मूर्ती व्यवसायात

कुंभारवाड्यातील सुमारे ६५ पैकी अंदाजे ५० कुटुंबे चिकण मातीच्या गणेशमूर्ती बनविण्याचा व्यवसायात असून मये, डिचोली व सभोवतालच्या परिसरातील जास्तीत जास्त लोक या ठिकाणाहून चिकण मातीच्या गणेशमूर्ती खरेदी करतात.

माती महाग; मूर्ती दरवाढही शक्य !

गावकर कुटुंबीय पूर्वी बोर्डे डिचोली येथील शेतमालकांकडून चिकण माती खरेदी करायचे. मात्र, आता डिचोली येथे चिकण मातीच्या टंचाईमुळे वारखंड पेडणे येथून माती आणली जाते.

१० मीटर माती खरेदी करण्यासाठी वाहतूक शुल्काव्यतिरिक्त सुमारे रु. १७००० मोजावे लागल्याची माहिती अर्जुन गावकर यांनी दिली.

शिवाय रंगांचेही दर भरमसाठ वाढल्याने मूर्तिकारांना यंदा मूर्तींचेही दर वाढवावे लागणार यात तिळमात्रही शंका नाही.

सध्या चिकण मातीच्या मूर्तीचे दर आकारानुसार रू.१००० ते रु. ७००० रु.पर्यंत असल्याचे गावकर यांनी सांगितले.