Dengue Cases in Goa: संपूर्ण देशभरात डेंग्यूचे रुग्ण वाढले आहेत. सध्या गोव्यातही याची साथ पसरत आहे. काही दिवसांपूर्वी कळंगुटमध्ये डेंग्यूमुळे एका महिलेचा मृत्यू झाला होता. किनारी पट्ट्यातील डेंग्यूच्या प्रकरणांमध्ये झपाट्याने वाढ होत आहे. या पार्श्वभूमीवर कळंगुट पंचायतीने रहिवाशांसाठी मोफत डेंग्यू चाचणी जाहीर केली आहे.

कळंगुट पंचायत कार्यक्षेत्रात डेंग्यूचे रुग्ण दिवसेंदिवस वाढत असल्याने पंचायत पुढील चाचण्या मोफत करणार आहे. NS1 डेंग्यू चाचणी, IgG, IgM, डेंग्यू चाचणी सल्लामसलत आणि प्लेटलेट मोजणी, सोमवार ते शनिवार सकाळी 9.30 ते 11 दरम्यान कळंगुट पंचायत कॉन्फरन्स हॉलमध्ये विनामूल्य करण्यात येणार आहे.

कांदोळी PHCचे माजी वैद्यकीय अधिकारी डॉ. दिवकर यांच्याकडून या चाचण्या केल्या जातील, अशी माहिती कळंगुटचे सरपंच जोसेफ सिक्वेरा यांनी दिली. कळंगुटचे आमदार मायकल लोबो यांनी कळंगुट-कांदोळी बीचवर देखरेख करणाऱ्या ग्रामपंचायती आणि कांदोळी प्राथमिक आरोग्य केंद्राला प्रतिबंधात्मक उपाययोजना राबवण्यासाठी आवाहन केले होते.

याबाबत नागरिकांनीही स्वत:ची काळजी घेण्याचे आवाहन करण्यात आले आहे. लोकांनी त्यांच्या सभोवतालचे साचलेले पाणी तपासले पाहिजे आणि कोणतेही कंटेनर रिकामे केले पाहिजेत. तसेच लक्षणे वेळेवर ओळखल्यास वैद्यकीय उपचारांना मदत होईलआणि रोगाचा प्रसार देखील टाळता येईल.