Panjim Accident स्मार्ट सिटी योजनेअंतर्गत पणजीत सध्या रस्त्यांची कामे सुरु असून जागोजागी खोदाई केली आहे. या ठिकाणी रस्ते खचून वाहने कलंडल्याच्या घटना घडत आहेत. आज पुन्हा अशीच घटना सेंट इनेज चर्च जवळ घडली आहे.

या ठिकाणी सीवेज सक्शन ट्रक पुन्हा कलंडला आहे. या अपघात सुदैवाने कुणालाही दुखापत झाली नाही. सीवेज सक्शन ट्रक कलंडल्याची दुसरी तर रस्ता खचण्याची ही चौथी घटना आहे.

या अगोदर काकुलो मॉल परिसरात जांभ्या विटांची वाहतूक करणारा ट्रक भररस्त्यात उलटला होता. त्या घटनेत 4 कामगार गंभीर जखमी झाले होते. तर दुसरी घटना सांतिनेज टोक परिसरात घडली होती.

या घटनेत सीवेज सक्शन ट्रक रस्ता खचल्याने कलंडला होता. तर तिसऱ्या घटनेत पणजीतील आझाद मैदान परिसरात सिमेंट पाईप घेऊन जाणारा ट्रक मागील चाके खड्ड्यात गेल्याने कलंडला होता.

या वारंवार घडणाऱ्या घटनांमुळे नागरिकांमधून संताप व्यक्त करण्यात येत आहे. सदरची कामे लवकरात लवकर मार्गी लावावीत असा सूर जनतेतून उमटत आहे.