मडगाव: कोंकण रेल्वे पोलिसांनी आज सकाळी थिवी (म्हापसा) रेल्वे स्थानकावर केलेल्या कारवाईत केरळच्या 4 युवकांना ड्रग्ससह अटक केली असून त्यांच्याकडून 45 हजारांचे अमली पदार्थ जप्त केले असल्याची माहिती मिळत आहे.अटक केलेल्या युवकांची नावे महमद अस्लम (26), नर्दीशा के. ए. (24), शफी व्ही. एच. (27) आणि महमद उनाय (24) अशी असून ते चारही जण थ्रिसुर केरळ येथील असल्याची माहिती कोंकण रेल्वेचे पोलीस निरीक्षक हिरू कवळेकर यांनी दिली आहे.

दोन दिवसांपूर्वी कोंकण रेल्वेने जाणाऱ्या एका महिलेचे 10 लाखांचे दागिने चोरीस गेले होते. त्यामुळे सर्व स्थानकांवर पोलीस पहारा वाढविण्यात आला होता. कुणी संशयित आढळल्यास त्यांची कसून चौकशी केली जात होती.आज सकाळी हे चारही युवक संशयास्पद रीतीने फिरत असताना पोलिसांनी त्यांच्या सामानाची झडती घेतली असता त्यांच्याकडे 7 ग्राम एमएमडीए, 20 ग्राम चरस आणि 6 ग्राम गांजा सापडला आहे.

हे युवक केरळला जाणारी गाडी पकडायला स्टेशनवर आले होते . पोलिसांना त्यांनी दिलेल्या माहितीनुसार केरळ मधील एका व्यक्तीने त्यांना हे ड्रग्स घेऊन यायला सांगितले होते. आणि त्यांनी ते अंजुणा येथे विकत घेतले होते.