झुआरीनगर येथील बिर्ला पोलिस चौकीबाहेर लागलेल्या आगीत 4 चारचाकी गाड्या जळून खाक झाल्या आहेत. सुरूवातीला सुक्या गवताला आग लागली त्यानंतर, त्याठीकाणी पार्क केलेल्या चार कार त्यात जळाल्या. रविवारी दुपारी (12 वा.) ही घटना घडली.

मिळालेल्या माहितीनुसार, रविवारी दुपारी झुआरीनगर येथे सुक्या गवताला अचानक आग लागली. त्यानंतर त्याठिकाणी असलेल्या चारचाकी गाड्यांनी पेट घेतला. वास्को अग्निशमन विभागाच्या अधिकाऱ्यांनी दिलेल्या माहितीनुसार दुपारी बाराच्या सुमारास ही घटना घडली.

पार्क केलेल्या 4 चारचाकी कारमध्ये एका टॅक्सीचाही समावेश आहे.

दरम्यान, वास्को अग्निशमन केंद्र, वेर्णा अग्निशमन केंद्र आणि झुआरी कंपनीच्या अग्निशमन दलाने घटनास्थळी धाव घेत आग आटोक्यात आणली. या घटनेत झालेल्या नुकसानीचा अद्याप अंदाज आलेला नाही मात्र अग्निशमन दलाच्या सूत्रांनी दिलेल्या माहितीनुसार, चार कारचे नुकसान 20 लाखांपेक्षा जास्त असण्याची शक्यता आहे.