पणजी : जमिनी हडप प्रकरणाचा तपास करत असलेल्या विशेष तपास पथकाने शुक्रवारी रात्री पुरातत्व खात्यातील रेकॉर्ड ॲटंंडंट शिवानंद मडकईकर याला अटक केली. त्या अगोदर गुरुवारी रात्री उशिरा पुरातत्व खात्यातील कर्मचारी धीरेश नाईक याच्याही मुसक्या आवळल्या होत्या. त्याला न्यायालयाने चार दिवसांची पोलिस कोठडी सुनावली. या प्रकरणातील अटक झालेला मडकईकर हा चौथा संशयित आहे.

विविध पोलिस स्थानकातून जमिनी हडपप्रकरणीच्या प्रलंबित असलेल्या सुमारे ३५ हून अधिक तक्रारी एसआयटीकडे दाखल झाल्या आहे. आसगाव येथील प्रकरण गंभीर असल्याने त्याच्या तपासकामावर अधिक लक्ष देऊन अधिक पुरावे जमा करत आहेत. तपासावेळी एसआयटीचे प्रमुख निधीन वाल्सन यांनी पुरातत्व खात्यात जाऊन तेथील कर्मचाऱ्यांकडे असलेल्या विविध कामांच्या ताब्यासंदर्भात माहिती मिळवली होती.

विक्रांतला ताब्यात घेल्यानंतर पुरातत्व खात्यातील जमिनीचे दस्तावेज महम्मद सुहैल आणून देण्यात मदत करत असल्याचे समोर आल्यावर त्यालाही अटक झाली. पुरातत्व खात्यातील धीरेश नाईक हा दस्तावेज खात्यातून देत होता. त्याच्या आधारे त्यानंतर बनावट दस्तावेज तयार करण्यात येत होते हे उघड झाल्यावर धिरेशला अटक केली. त्यानंतर मडकईकर याच्याकडे दस्तावेजचा ताबा होता व त्याचा धीरेश याच्याशी लागेबांधे असल्याची माहिती मिळाल्याने मडकईकर यालाही अटक झाली.

विक्रांत शेट्टीला जामीन मंजूर

शुक्रवारी संशयित विक्रांत शेट्टी याला म्हापशातील प्रथम श्रेणी न्यायालयाने सशर्त जामीन मंजूर केला. उत्तर गोव्यातील सुमारे 5 हजार चौरस मीटरच्या किमान आठ मालमत्तांच्या फसवणूकीत विक्रांतचा थेट सहभाग असल्याचा ठप्पका एसआयटीने त्याच्यावर ठेवला आहे.