सासष्टी: बाणावलीचे नवनिर्वाचित आमदार वेन्झी व्हिएगस यांनी माजी क्रीडामंत्री व बाणावलीचे माजी आमदार फ्रांसिस्को मॉंत क्रुझ यांची भेट घेऊन त्यांचे आशीर्वाद घेतले. त्यावेळी मॉंत क्रुझ भावूक झाले.

वेन्झी व्हिएगस यांनी सांगितले, की मॉंत क्रुझ यांची भेट ही उत्साही, आनंद देणारी व भावनिक आहे. ते शिस्तबद्ध नियोजन, प्रशासकीय निर्णयाची योग्यप्रकारे अंमलबजावणी करणारे व भ्रष्टाचारापासून चार हात दूर राहणारे असे व्यक्तिमत्व आहे.

केवळ सहा महिन्यांत त्यांनी आंतरराष्ट्रीय दर्जाचा स्टेडियम पूर्ण केला. हे त्यांचे कार्य कायम आठवणीत राहील. त्यांचे स्वप्न पूर्ण करण्याचा आपला प्रयत्न राहील. मतदारसंघात वीज, पाणी व चांगले रस्ते यांचे योग्य नियोजन केले जाईल. मतदारसंघातील सर्व पंचायत क्षेत्रांमध्ये विकासाबाबत कधीही भेदभाव केला जाणार नाही, असेही वेन्झी व्हिएगस यांनी सांगितले.

फ्रांसिस मॉंत द क्रुझ हे 1980 व 1984 असे दोनवेळा बाणावली मतदारसंघाचे आमदार राहिले आहेत.