Tracking Devices to be Placed on Black Panthers in Goa: केपे तालुक्यातील बाळ्ळी येथे लोकवस्तीत फिरणाऱ्या काळ्या बिबट्याला (ब्लॅक पॅंथर) वन विभागाने 1 एप्रिल रोजी पिंजऱ्यात पकडले होते. याचा अधिकचा अभ्यास करण्यासाठी वन विभागाने कर्नाटकातून डॉक्टरांचे पथक बोलवले आहे.

याशिवाय या बिबट्यावर लक्ष ठेवण्यासाठी संपर्क यंत्र (ट्रॅकिंग डिव्हाईस) बसवण्यात येणार आहे, अशी माहिती वनमंत्री विश्वजीत राणे यांनी दिली आहे.

गोव्याच्या जंगलांमध्ये काळ्या बिबट्यांचा वावर होता, हे यापूर्वी वन विभागाने लावलेल्या कॅमेरा ट्रॅपिंगमध्ये सिद्ध झाले होते. आता बाळळी परिसरातील लावण्यात आलेल्या पिंजऱ्यामध्ये हा बिबट्या सापडला आहे.

पहिलाच प्रयोग

राज्यातील वनविभागाने आतापर्यंत अनेक प्रकारचे लोकवस्तीत आलेले प्राणी ,पक्षी,उभयचर प्राणी परत जंगलात सोडले आहेत. मात्र त्यांच्यावरच्या लक्ष ठेवण्यासाठी ट्रॅकिंग डिव्हाईस बसवण्यात आले नव्हते.

वन विभागाने लावलेल्या पिंजऱ्यामध्ये पहिल्यांदाच काळा बिबट्या सापडला आहे. त्यामुळे वनविभागाच्या दृष्टीने हे नवे आव्हान आहे. म्हणूनच त्याच्यावर लक्ष ठेवण्याकरता हे ट्रॅकिंग डिव्हाईस लावण्यात येत आहे. राज्यातला हा पहिलाच प्रयोग आहे, असे वनविभागाच्या वतीने सांगण्यात आले.