गोव्यात येणारे देशी विदेशी पर्यटक विविध अतरंगी प्रकार करत असतात. त्याचे अनेक व्हिडिओ वेळोवेळी समोर आले आहेत. बऱ्याचवेळा काही पर्यटकांकडून अनुचित प्रकार केले जातात त्याविरोधात पोलिसांनी कारवाई करत असे प्रकार करू नयेत अशी ताकीद देतात.

दरम्यान, म्हापसा, गोवा येथून दोन परदेशी नागरिकांचा एक अतरंगी व्हिडिओ समोर आला आहे.

काय आहे व्हिडिओ?

दोन परदेशी नागरिकांचा हा व्हिडिओ असून, त्यात एक महिला आणि पुरूष परदेशी नागरिक बस पाठिमागे लटकून फ्री प्रवास करताना दिसत आहेत. म्हापसा येथील हा व्हिडिओ असून ती बस देखील खाजगी आहे.

परदेशी नागरिक बसच्या मागे लटकत असताना कोणीतरी हा व्हिडिओ रेकॉर्ड केला असून, सध्या हा व्हिडिओ सोशल मिडियावर तुफान व्हायरल होत आहे.

प्रवासी वाहतूक करणाऱ्या या खासगी बसमध्ये प्रवासी बसलेले दिसत असून, दोघे परदेशी नागरिक बसच्या मागे फ्री राईडचा आनंद घेत आहेत. बसने थोडेच अंतर कापल्यानंतर ते दोघेही खाली उतरतात.

दरम्यान, अशाप्रकारे प्रवास धोकादायक ठरू शकतो त्यामुळे असे प्रकार करू नयेत आणि गोव्यातील वैविध्यपूर्ण पर्यटनाचा आस्वाद पर्यटकांनी घ्यावा अशी प्रतिक्रिया समाज माध्यमातून समोर येत आहे.