Food Street : वाळपई, आरोग्यमंत्री विश्वजित राणे यांच्या प्रयत्नाने राज्यात झपाट्याने विविध विकासकामे मार्गी लागत आहेत. आरोग्याच्या बाबतीत असो किंवा वाळपई नगरपालिका मैदान, मासोर्डे येथील फुटसाल मैदान वा नाणूस येथे काम सुरु असलेले मैदान, गार्डन आदी प्रकल्पांमुळे वाळपईचा दोन वर्षांपासून चेहरा मोहराच बदलत आहे.

‘फूड स्ट्रीट’ही दुकानांची रचना बदलून नव्या ढंगात येणार आहे. ‘जी- सुडा’तर्फे ही सर्व कामे मार्गी लागत आहेत. या प्रमाणेच आता वाळपई पालिकेच्या मार्केट संकुलचे सौंदर्यीकरण होणार आहे.

फूड स्ट्रीटसाठी दीड कोटी मंजूर

राष्ट्रीय आरोग्य अभियानंतर्गत वाळपई येथे ७८. ९७ लाख रुपये खर्चून फूड स्ट्रीट आणि मुरगाव येथे ७८.७३ लाख रुपये खर्चून फूड स्ट्रीट विकसित करण्यात येणार आहे. राज्य नागरी विकास संस्थेने या प्रकल्पांसाठी निविदा मागविल्या व त्याला मंजुरी मिळालेली आहे.

वडापाव गाडे स्थलांतर सुरू

दरम्यान,बुधवारपासून नगरपालिकेच्या परिसरात असलेल्या वडापावचे गाडे काढण्याचा आदेश पालिकेने दिला आहे. सध्याच्या परिसराचे सौंदर्यीकरण होणार असल्याने प्रकल्पाचे काम पूर्ण होत नाही. तोपर्यंत व्यावसायिकांना पर्यायी जागा दिली जाणार आहे.

वाळपईला लवकर शहराचा दर्जा मिळणार आहे. त्यासाठी मुंबईच्या धर्तीवर वाळपईत सर्व सुविधा वाळपईत मिळणार आहे. मुंबई सारख्या शहरात असलेले फूड स्ट्रीट राज्यात यावे यासाठी आपले प्रयत्न होते. त्यामुळे राज्यात एक मुरगाव व तर दुसरा वाळपईत प्रकल्प होणार आहे.

- विश्वजित राणे,आरोग्यमंत्री