Goa Express: गोवा एक्सप्रेसमधील आठ प्रवाशांची तब्येत अचानक खराब झाल्याचा धक्कादायक प्रकार सोमवारी रात्री उघडकीस आला. प्रवाशांना अन्नातून विषबाधा झाल्याचा संशय व्यक्त केला जात असून, त्यांना उपचारासाठी बेळगाव जिल्हा रुग्णालयात दाखल करण्यात आले आहे. उपचाराधीन प्रवाशांमध्ये महिला आणि पुरुषांचा समावेश आहे.

मिळालेल्या माहितीनुसार, गोव्यातील वास्को-द-गामा ते दिल्लीच्या हजरत निजामुद्दीन मार्गावर धावणाऱ्या गोवा एक्स्प्रेस ट्रेनमध्ये आठ प्रवाशांना अन्नातून विषबाधा झाल्यासारखी लक्षणे आढळून आली. प्रवासात अचानक त्रास होऊ लागल्याने महिला आणि पुरुष प्रवाशांना रात्री बेळगावच्या जिल्हा रुग्णालयात दाखल करण्यात आले.

सर्व प्रवाशी खांडवा, मध्य प्रदेश येथील रहिवाशी असल्याची माहिती समोर आली आहे. प्रवाशांना त्रास होत असल्याचे लक्षात येताच सहप्रवाशांनी रेल्वे पोलिसांनी याची माहिती दिली, त्यानंतर पोलिसांनी बेळगाव येथे ट्रेन थांबवली.

प्रवाशांचे साहित्य चोरी करण्याच्या उद्देशाने कोणीतरी त्यांना संशयास्पद पदार्थ खाण्यास दिले असा संशय व्यक्त केला जात आहे. वैद्यकीय अधिकाऱ्यांनी अन्नाचे नमूने तपासणीसाठी पाठवले असल्याचे म्हटले आहे. तपासणी अहवाल समोर आल्यानंतर त्यांना नक्की कशामुळे त्रास झाला याची माहिती मिळेल असे डॉक्टरांनी म्हटले आहे.

तसेच, प्रवाशांनी सोबत आणलेले पदार्थच खाल्ले होते त्यांनी दुसरे काही मागविले नाही. असेही सांगितले जात आहे. दरम्यान, याबाबत अधिकृत माहिती अद्याप समोर आलेली नाही. पोलिसांनी प्रवाशांच्या नातेवाईकांना याबाबत माहिती दिली असून, अधिक तपास पोलीस करत आहेत.