मडगाव: शहराच्या विविध भागात कार्यरत असलेल्या फास्ट फूडवाल्यांबाबतच्या तक्रारींची गंभीरपणे दखल घेऊन मडगाव पालिकेने त्यांना स्वच्छतेसह नियमांची काटेकोरपणे अंमलबजावणी करा अन्यथा, कारवाईस सामोरे जावे लागेल, असे बजावले आहे.

('Follow the rules or face action', warns Madgaon Municipality)

पालिका मुख्याधिकारी रोहित कदम यांनी बुधवारी सायंकाळी स्वच्छता निरीक्षक विराज आरांबेकर व संजय सांगेलकर यांच्या समवेत जुन्या बसस्थानकावर जाऊन तेथील फास्ट फूड व्यवहाराची पहाणी केली व नंतर या सूचना दिल्या. यावेळी नगरसेवक जॉन आल्वारिस व माजी नगरसेवक राजेंद्र आजगावकर हेही उपस्थित होते.

पहाणीनंतर कदम यांनी फास्ट फूडवाल्यांना त्यांनी सर्वत्र परिसर अस्वच्छ करू नये,व्यवसायानंतर गाडे तेथून हटवावेत, तो भाग आरोग्यदायी ठेवावा, तयार होणारा कचरा वेगवेगळा करून व्यवस्थित ठेवावा, वगैरे सूचना केल्या व नियमांचे उल्लंघन झाल्यास पाच हजारांचा दंड पडेल या बाबत इशारा दिला.

विराज आरांबेकर यांनी त्यांना सदर ठिकाणी शीतपेय विकता येणार नाही, सामान घेऊन रिक्षा आणता येणार नाही,पाणी साठवून ठेवता येणार नाही, की गटारात सांडपाणी टाकता येणार नाही, अशा सूचना केल्या. त्या न पाळणाऱ्यांना ओढून नेण्याचा इशाराही त्यांनी दिला.

नंतर मुख्याधिकारी पत्रकारांशी बोलताना म्हणाले की मडगाव पालिकेचा हेतू कोणाला सतावण्याचा नाही तर लोकांना आरोग्यदायी अन्नपदार्थ मिळावेत हा आहे.