फोंडा: फोंड्यातील नागरिकांना नेहमीच चांगले ते देण्याचा माझा प्रयत्न राहिला आहे. आताही गेला बराच काळ रखडत असलेल्या रस्त्यांचे डांबरीकरण करण्यात येत असून मलनिस्सारण प्रकल्पामुळे रखडलेल्या रस्त्याच्या डांबरीकरणाला आता चालना मिळाली आहे. त्यामुळे पुढील काळात फोंड्यातील रस्ते हे चकाचक झालेले असतील, अशी ग्वाही फोंड्याचे आमदार तथा कृषीमंत्री रवी नाईक यांनी दिली.

वरचा बाजार - दुर्गाभाट भागातील रस्ता हॉटमिक्स डांबरीकरणाचा शुभारंभ आज (गुरुवारी) मंत्री रवी नाईक यांच्या हस्ते झाला. यावेळी फोंड्याचे नगराध्यक्ष रितेश नाईक, स्थानिक नगरसेवक शांताराम कोलवेकर, नगरसेवक आनंद नाईक तसेच सार्वजनिक बांधकाम खात्याचे अभियंते अरविंद फडते व अन्य मान्यवर मंडळी उपस्थित होती.

नगराध्यक्ष रितेश नाईक यांनीही रस्ता डांबरीकरण शक्य तेवढ्या लवकर पूर्ण करण्याची सूचना केली.