मांद्रे मतदार संघातील खेळाडूंना आणि वेगवेगळ्या कला, क्रीडा प्रकारांना वाव देण्यासाठी मांद्रे पंचायत क्षेत्रात ७० कोटींपेक्षा जास्त खर्च करून बहुउद्देशीय क्रीडा मैदान उभारण्याबरोबरच गोव्यात प्रथमच इनडोअर स्टेडियममध्ये स्विमिंग पूल उभारण्याची योजना आहे,अशी माहिती मांद्रेचे आमदार जीत आरोलकर यांनी दिली. क्रीडा अधिकारी आणि इतर स्थानिक पंच सदस्यांच्या उपस्थितीत मांद्रे मैदानाची पाहणी केली. त्यावेळी अधिकाऱ्यांना सूचना करत असताना आरोलकर यांनी माहिती दिली.

आमदार आरोलकर म्हणाले, या प्रकल्पासाठीचा खर्च केंद्र की राज्य सरकारमधून उपलब्ध होईल हे काही दिवसानंतर कळणार आहे. तोपर्यंत प्रकल्पाचा पूर्ण आराखडा तयार करण्यात येणार आहे. इनडोअर स्विमिंग पूल उभारण्याचा प्रथमच प्रयोग राज्यात होणार आहे. शिवाय हा स्विमिंग पूल उभारताना उन्हाळ्यात आणि हिवाळ्यात बदलते वातावरण करण्यासाठी तशी तरतूद केली जाईल.

मांद्रे पंचायत क्षेत्रातील जे ३० वर्षांपूर्वीचे क्रीडा मैदान उपलब्ध होते. त्या मैदानाचा नवीन आराखडा तयार करून त्या ठिकाणी सर्व सोयी सुविधा उपलब्ध करून देण्यासाठी आमदार जीत आरोलकर यांनी सरकार दरबारी प्रयत्न केले आहेत. शिवाय क्रीडामंत्री गोविंद गावडे यांनीही १००% सहकार्य दिल्यामुळे हा प्रकल्प आता मार्गी लागणार आहे. २५ रोजी आमदार जीत आरोलकर स्थानिक पंचायत मंडळ अधिकारी यांनी या आराखड्याविषयी चर्चा केली. आमदार आरोलकर यांनी अधिकाऱ्यांना क्रीडापटूंना सर्व प्रकारच्या सोयी सुविधा कशा उपलब्ध होतील त्याकडे लक्ष देण्याची सूचना केली.