अग्निशमन दलाच्या जवानांच्या कर्तृत्वाचे किस्से आपण याआधी ही ऐकले आणि पाहिले आहेत. अशीच एक गोष्ट वागातोरमध्ये घडली आहे. अग्निशमन दलाच्या जवानांना खोल विहिरीत पडलेल्या माणसाला जीवदान दिले आहे. (Firefighters Saved Man )

माहितीनुसार, वागातोर शापोरा येथे एका आंब्याच्या झाडाजवळ असलेल्या विहिरीमध्ये पश्चिम बंगालचा एक रहिवासी पडला होता. मात्र याची माहिती अग्निशमन दलाच्या जवानांना मिळताच जवान गिरीश गवस आणि अर्जुन धावस्कर यांनी त्या 26 वर्षीय माणसाला मध्यरात्री सुखरूपपणे बाहेर काढले. ही विहीर 80 फूट खोल होती पण जवानांनी धाडस दाखवत त्या इसमाला सुखरूप बाहेर काढले.

त्यामुळे सर्वच स्तरातून अग्निशमन दलाच्या जवानांचे कौतुक होत आहे.

दरम्यान, कोलवाळमध्ये आग लागून चार भंगारअड्डे जळून पूर्णतः खाक झाले. तरी 24 तास उलटूनही ही आग अजूनही धुमसते. या आगीवर नियंत्रण मिळविण्याचे काम अग्निशमन दलाकडून युद्धपातळीवर सुरू होते. हे चारही दुर्घटनाग्रस्त अड्डे 8 हजार चौ.मी. जागेत पसरल्याने जवानांना प्रचंड मेहनत घ्यावी लागली. या आगीमुळे परिसरात मोठ्या प्रमाणात विषारी धूर पसरला आहे.

मूशीरवाडा येथे भंगारअड्ड्यांना लागलेल्या आगीवर गोवा अग्निशमन दलाने सध्या 80 टक्के नियंत्रण मिळविले. ही आग विझविण्यासाठी आतापर्यंत 3.5 लाख लिटर पाण्याचा वापर केल्याची माहिती गोवा अग्निशमन दलाचे संचालक नितीन रायकर यांनी घटनास्थळी दिली. यावेळी म्हापसा अग्निशमन दलाचे प्रभारी बॉस्को फेर्राव हेही उपस्थित होते.