Fire In Goa आज दिवसभरात आगीची तिसरी घटना घडलीय. शिवोली- मोर्णा येथील रस्त्याच्या बाजूला असलेल्या वडाच्या झाडाला आग लागल्याची घटना घडली आहे.

घटनेची माहिती मिळताच अग्निशामक दल घटनास्थळी पोहोचले असून वेळीच आगीवर नियंत्रण मिळवण्यात त्यांना यश आलंय. सदरची आग नेमकी कधी आणि कशी लागली याची माहिती अद्याप प्राप्त झाली नाहीय.

दरम्यान दिवसभरातील ही आगीची तिसरी घटना असून सकाळी म्हापसा येथील सुपरमार्केटच्या जनरेटरला आग लागल्याची घटना घडली होती. तर दुपारी कुडचडे येथील जंगलाला आग लागल्याचे वृत्त हाती आले होते.

मागील महिन्याभरात गोव्यात आगीचे सत्र सुरु होते. म्हादई जंगलातील आग तर बरेच दिवस धुमसत होती. अग्निशामक दलाचे प्रयत्न काहीसे तोकडे पडू लागल्यानंतर हेलिकॉप्टर द्वारा आगीवर नियंत्रण मिळवण्यासाठी प्रयत्न केले गेले. दरम्यान गोव्यात वेगवेगळ्या ठिकाणी लागलेल्या आगींमुळे वृक्षसंपदेसह बऱ्याच मोठ्या प्रमाणावर आर्थिक नुकसान झाले.