Fire at Taleigao Goa: गोव्यात गेल्या काही दिवसापासून विविध ठिकाणी अक्षरशः आगींच्या घटनांचे पेव फुटले आहे. संपुर्ण राज्यातून विविध ठिकाणांहून आगीच्या घटनांच्या बातम्या येत आहे.

आज, शुक्रवारी दुपारी ताळगाव येथील ऐन शहराच्या मध्यभागी असलेल्या सुक्या गवताला आग लागली होती. आणि आता उत्तर गोव्यातील वाळपईतही गवताला आग लागल्याची घटना घडली आहे.

दरम्यान, वाळपईतील आगीची ही गेल्या काही काळातील 107 वी घटना आहे. सोनशी येथील फोमेंतो माईन्स येथील सुकलेल्या गवताने दुपारी पेट घेतला. आग लक्षात आल्यानंतर तत्काळ अग्निशमन दलाला कळवण्यात आले.

त्यानंतर तत्काळ अग्निशमन दलाची गाडी घटनास्थळी तीन वाजून वीस मिनिटांनी दाखल झाली. या आगीत जीवितहानी झालेली नाही. सी. जी. मानगावकर यांच्या नेतृत्वाखाली अग्निशमन दलाच्या जवानांनी ही आग विझवली.

दरम्यान, ताळगाव येथील आयडीयल स्कूलच्या समोर असलेल्या मोकळ्या भागातील गवताने पेट घेतला. ही आग वाढत जाऊन मोठ्या प्रमाणात धुर निर्माण झाला होता. पणजी ते ताळगाव मार्गावर मोठ्या प्रमाणात धुर झाल्याने वाहनधारकांनाही त्रास झाला.

दरम्यान, वसंत विहार इमारतीकडील बाजूने अग्निशमन दलाने ही आग विझवत आणली. तर पणजीकडील बाजूनेही नागरिकांनी स्वतःच पाणी आणि झाडांच्या सहाय्याने आग विझवली.