मडगाव: अग्निशामक दलाने मडगावमधील दोन बाजार संकुलांचा फायर ऑडिट अहवाल सादर करून आणि सुरक्षेच्या उपाययोजना प्राधान्याने कराव्यात, अशी विनंती करून सहा महिने उलटले आहेत. मात्र मडगाव पालिकेने हा सावधगिरीच्या इशाऱ्याकडे दुर्लक्ष केले आहे.

गतवर्षी नाताळच्या हंगामात मडगाव येथील न्यू मार्केटला मोठ्या आगीने वेढल्यानंतर ऑडिट करण्यात आले होते. आगीनंतर जिल्हाधिकाऱ्यांनी तातडीने बैठक बोलावून ३ जानेवारी रोजी तपासणी केली होती.

१३ जानेवारी रोजी अग्निशामक सेवा उपसंचालक राजेंद्र हळदणकर यांनी सर्वसमावेशक ‘फायर ऑडिट’ निष्कर्ष मडगाव पालिका मुख्याधिकाऱ्यांना पाठवला होता. त्यात भविष्यात आगीच्या घटना टाळण्यासाठी उपाय सांगितले आहेत.

दोन्ही बाजार संकुलाना स्पष्टपणे सीमांकन आवश्यक आहे. निर्गमन, ठळकपणे दिसणारे चिन्ह, विनाअडथळा आपत्कालीन मार्ग आणि अग्निशमन उपकरणे ठेवणे आवश्यक आहेत. यात फायर हायड्रंट्स, होज रील, फायर पंप, प्रथमोपचार किट, पाण्याच्या ओव्हरहेड टाक्या आणि अग्निरोधक रंग यांचा समावेश आहे.