मडगाव फेस्‍त फेरीच्‍या सोपो करातून आलेली १७ लाखांची रक्‍कम पालिकेच्‍या तिजोरीत न भरता परस्‍पर स्‍वत:च्‍या खात्‍यात वळवून लाखोंचा गफला केल्याचा आरोप असलेला मडगाव पालिकेचा कारकून योगेश शेटकर याच्‍याविरोधात पोलिसांनी अखेर गुरुवारी (ता. २५) रोजी रात्री ‘लुकआऊट’ नोटीस जारी केली.

योगेशविरोधात मडगाव पालिकेने अफरातफर केल्‍याची तक्रार देऊन एक महिना उलटला तरी पोलिस त्‍याला का अटक करत नाहीत आणि ताे जर सापडत नसेल, तर पोलिस त्‍याच्‍याविरोधात ‘लुक आऊट’ नोटीस का जारी करत नाहीत, असे प्रश्‍नार्थक वृत्त ‘गोमन्तक’ने गुरुवारी प्रसिद्ध करून मडगाव पोलिसांच्‍या कार्यक्षमतेवर बोट ठेवले होते. त्‍यानंतर गुरुवारी रात्रीच त्याच्या विरोधात ‘लुक आऊट’ नाेटीस जारी करण्‍यात आली.

पालिकेत झालेल्या या घोटाळ्याची ‍मडगावात चर्चा सुरू होती. पोलिस कुणाच्‍या दबावाखाली येऊन मुद्दाम तपासात कुचराई तर करत नाहीत ना, असा प्रश्‍न लाेक करू लागले होते. मुख्‍यमंत्री आणि मुख्‍य सचिव यांच्‍याकडे तक्रार करणारे शॅडो कौन्‍सिलचे निमंत्रक सावियो कुतिन्‍हो यांनीही तपासावर प्रश्‍नचिन्ह उभे केले आहे.

दोनवेळा नोटीस जारी

याप्रकरणी मडगाव पाेलिसांशी संपर्क साधला असता, योगेशला अटक करण्‍यासाठी कित्‍येकदा पोलिस त्‍याच्‍या घरी गेले. मात्र तो सापडला नाही. बुधवारीही पाेलिस त्‍याला पकडण्‍यासाठी घरी गेले होते. मात्र, तो हाती लागला नाही. फौजदारी आचारसंहिता कलम ४१ नुसार त्‍याला चौकशीसाठी मडगाव पोलिस स्‍थानकात हजर राहावे, अशी दोनवेळा नोटीस जारी केली होती, अशी माहिती पोलिसांनी दिली.

याेगेश पालिकेतूनही गायब :

योगेश शेटकर याला पालिकेने निलंबित केले असले तरी त्‍याला पालिकेत हजर राहण्‍याचा आदेश दिला आहे. असे असले तरी गेला महिनाभर ‍ तो फिरकलेला नाही. रजा मिळावी, यासाठी त्‍याने अर्ज दिला हाेता.

मात्र, हा अर्ज फेटाळल्याची माहिती पालिकेकडून मिळाली आहे. रजा मंजूर झाली नसतानाही शेटकर गैरहजर कसा आणि पालिकेने अद्याप कारवाई का केली नाही, असा सवाल सध्‍या मडगाववासी करू लागले आहेत.