पणजी: फोंडा (Ponda) पालिकेचे नगराध्यक्ष शांताराम गोपिनाथ कोलवेकर यांच्याविरुद्ध अविश्‍वास ठराव (Filed a no-confidence motion) दाखल करण्यात आला आहे. अविश्‍वास ठराव दाखलेल्या निवेदनावर 7 नगरसेवकांच्या सह्या आहेत. या घडामोडीमुळे फोंड्यातही राजकीय वातावरण तापू लागले आहे. या ठरावावर विश्‍वनाथ दळवी (प्रभाग 7), विरेंद्र ढवळीकर (प्रभाग2), वंश सरकार (प्रभाग 3), अर्चना डांगी (प्रभाग 1), अरविंद नाईक (प्रभाग 14), विलियम आगियार (प्रभाग 6) व फोंड्याचे आमदार रवी नाईक यांचे पुत्र रितेश नाईक (प्रभाग 11) यांचा समावेश आहे.

फोंडा पालिकेतील 15 नगरसेवकांपैकी 7 नगरसेवकांनी हा अविश्‍वास ठराव दाखल केला आहे. हा ठराव संमत होण्यासाठी किमान 8 नगरसेवकांची आवश्‍यकता आहे. नगराध्यक्षाविरुद्ध हा अविश्‍वास ठराव दाखल झाला असल्याने एका नगरसेवक हाती लागण्यासाठी मोठी उलाढाली होण्याची शक्यता आहे. नगराध्यक्षाविरुद्धच्या ठरावावर मतदान झाल्यास सध्याच्या स्थितीवरून 7 - 7 असा बलाबल दिसते. त्यामुळे फोंडा पालिकेत ही उलथापालथ होणार की या ठराव बारगळणार याकडे लोकांचे लक्ष लागून राहिले आहे.