गोव्यात दररोज आगी लागण्याच्या घटना वाढत असून लाखोंची नुकसानी होत असल्याचे समोर येत आहे. आंबा-काजू बागा, बागायती, तसेच माळरान या ठिकाणी आगी लागण्याचे प्रमाण जास्त असून वाऱ्यामुळे अशा ठिकाणच्या आगी वेगाने पसरत जात असल्याचेही पाहायला मिळतेय. अशीच एक घटना सत्तरे-सत्तारी येथील म्हादई वन्यजीव अभयारण्यात घडल्याचे प्राथमिक वृत्त हाती येतेय.

सत्तरे-सत्तारी येथील म्हादेई वन्यजीव अभयारण्यात डोंगराच्या माथ्यावर भीषण आग लागली असून ही आग विझवण्यासाठी स्थानिक आटोकाट प्रयत्न करीत आहेत. या अभयारण्याशेजारी काजू बागांना असल्याने या आगीमुळे काजू बागायतीला धोका निर्माण झाला आहे. त्यामुळेच स्थानिक हि आग थांबवण्यासाठी धडपडत असल्याची माहिती समोर येतेय.

हि आग नेमकी कशी लागली? या घटनेची माहिती अग्निशामक दलाला मिळाली आहे का? या बाबत अद्याप तरी सविस्तर माहिती मिळू शकली नाहीय. मात्र गोव्यात सध्या लागणाऱ्या या आगींमुळे जनतेतून चिंता व्यक्त करण्यात येत आहे.