FDA Seizes 500 Kg of Mawa Worth ₹1.89 Lakh in Margao Raids

मडगाव: राज्यात गेल्या काही दिवसांत एफडीएच्या कारवाया वाढल्या आहेत. एफडीएचे अधिकारी सातत्याने छापेमारी करुन भेसळयुक्त खाद्यपदार्थ जप्त करत आहेत. यातच आता, एफडीए अधिकाऱ्यांच्या टीमने मडगावात वेगवेगळ्या ठिकाणी छापेमारी करुन दोन कारमधून तब्बल 1.89 लाखांचा मावा जप्त केला.

काय आहे नेमकं प्रकरण?

दरम्यान, एफडीएच्या अधिकाऱ्यांनी आज (7 एप्रिल) मडगावात दोन वेगवेगळ्या ठिकाणी छापेमारी करुन तब्बल 500 किलो मावा जप्त केला. दोन कारमधून (Car) हा मावा जप्त करण्यात आला. जप्त केलेल्या माव्याची बाजारभावानुसार किंमत 1.89 लाख आहे. रिचर्ड नोरोन्हा आणि संजोत कुडाळकर यांच्या टीमने ही कारवाई केली.

फास्ट फूड दुकानांवर कारवाई

तीन दिवसांपूर्वी, म्हापसा (Mapusa) येथील जुने मार्केट (अलंकार थिएटर) परिसरातील फास्ट फूड दुकानांवर एफडीएने छापेमारी करुन मोठी कारवाई केली होती. अस्वच्छ जागेतील काही फास्ट फूड बंद करुन शिजलेल्या वस्तू यावेळी जप्त करण्यात आल्या होत्या. एफडीएच्या अधिकाऱ्यांनी अचानक ही कारवाई करत येथील फास्ट फूड स्टॉल्सची तपासणी केली होती. येथील जवळपास 70 टक्के फास्ट फूड आणि हॉटेल रेस्टॉरंट दुकाने अस्वच्छतेमुळे बंद करण्यात आली होती. यापूर्वी देखील येथील दुकाने बंद करण्यात आली होती. अन्न आणि औषधे प्रशासनाने छापा टाकून रेस्टॉरंट आणि फास्ट फूड मिळून एकूण 10 आस्थापने बंद केली. ही आस्थापने अस्वच्छ तसेच असुरक्षित असे खाद्यपदार्थ बनवत होती, असे अधिकाऱ्यांना पाहणीवेळी आढळले.