कळंगुट: अन्न व औषध प्रशासन (FDA) विभागाने कळंगुट आणि बागा येथे अचानक रात्री उशिरा केलेल्या तपासणी मोहिमेत मोठी कारवाई केली आहे. निकृष्ट दर्जाचे काजू विकणाऱ्या ८ दुकानांवर कारवाई करून ती बंद करण्यात आलीयेत . याशिवाय, बागा जंक्शन येथील ३ मुघलाई रेस्टॉरंटही नियमांचे उल्लंघन केल्याबद्दल बंद करण्यात आली.

या मोहिमेदरम्यान, एफडीएच्या पथकाने कळंगुट आणि बागा येथील एकूण १९ दुकानांची तपासणी केली. यात कळंगुटमधील १ आणि बागा येथील ७ दुकाने निकृष्ट दर्जाचे काजू विकताना आढळल्याने ती तातडीने बंद करण्यात आली.

निकृष्ट दर्जाचे काजू विकणाऱ्या विक्रेत्यांवर प्रत्येकी ५०,००० रुपयांचा दंड ठोठावण्यात आला, तर गैर-ब्रँडेड काजू विकणाऱ्यांवर प्रत्येकी २०,००० रुपयांचा दंड लावण्यात आला. या निकृष्ट साठ्याचा स्रोत शोधण्यासाठी पुढील तपासही सुरू करण्यात आला आहे. याच मोहिमेत बागा जंक्शनवरील तीन मुघलाई रेस्टॉरंट्सही विविध नियमांचे उल्लंघन करताना आढळली. त्यामुळे ती बंद करून त्यांच्यावर प्रत्येकी २०,००० रुपयांचा दंड लावण्यात आला.

एफडीए संचालक श्वेता देसाई यांच्या मार्गदर्शनाखाली उत्तर गोवा विभागाचे अधिकारी रिचर्ड नोरोन्हा यांनी ही कारवाई केली. या पथकात वरिष्ठ अन्न सुरक्षा अधिकारी राजाराम पाटील, अन्न सुरक्षा अधिकारी अमित मांद्रेकर, डार्लान दिउकर, प्रितम परब, सुजाता शेटगावकर यांच्यासह अर्जुन नाईक, संदीप शेळके आणि प्रदीप परसेकर यांचा समावेश होता.