मडगाव: एफडीएने बुधवारी दवर्ली येथे अन्न व्‍यवसाय चालकांचा परवाना आणि स्‍वच्‍छता विषयक परिस्‍थिती तपासण्‍यासाठी तपासणी मोहीम हाती घेतली. या तपासणीत दवर्ली येथील मिठाई उत्‍पादक मेसर्स मल्‍लेश्‍‍वर फूड प्राेडक्‍ट हे वैध एफएसएसएआय परवान्‍याशिवाय मिठाई तयार करत होते. शिवाय ती जागा अस्‍वच्‍छ होती. ‘एफबीओ’वर कलम ३१ ची सूचना देण्‍यात आली होती आणि तपासणी अहवालदेखील जारी केला होता.

‘एफबीओ’ला तो वैध ‘एफएसएसएआय’ परवाना मिळेपर्यंत मिठाई तयार करण्‍याचे थांबविण्‍याचे निर्देश दिले आहे. या ठिकाणी सुमारे ३५ हजार रुपये किमतीचा १२५ किलो मावा अयोग्‍य स्‍थितीत अस्‍वच्‍छ जागेत साठवून ठेवल्‍याचे आढळून आले.

अयोग्‍यरित्‍या साठवून ठेवलेला हा मावा सार्वजनिक आरोग्‍याच्‍या हितासाठी धाेकादायक असल्‍याने ‘एफबीओ’ने ताे स्‍वेच्‍छेने जप्‍त करून नष्‍ट केला. ही कारवाई ‘एफडीए’च्‍या संचालक श्‍वेता देसाई यांच्‍या मार्गदर्शनाखाली पदनिर्देशित अधिकारी संज्‍याेत कुडाळकर, वरिष्‍ठ अन्न सुरक्षा अधिकारी प्रिया देसाई, अन्न सुरक्षा अधिकारी अमित मांद्रेकर, स्‍नेहा नाईक, अभिषेक नाईक आणि गौरेश गावकर, साईनाथ मांद्रेकर यांनी केली.