Reliance Foundation Development League एफसी गोवा संघाने केरळा ब्लास्टर्सवर एका गोलने निसटता विजय नोंदवून रिलायन्स फाऊंडेशन डेव्हलपमेंट लीग (आरएफडीएल) फुटबॉल स्पर्धेच्या मुख्य फेरीतील बंगळूर विभागात अव्वल स्थान मिळविले.

बंगळूर फुटबॉल स्टेडियमवर शनिवारी झालेल्या लढतीत ब्रायसन फर्नांडिस याने 48 व्या मिनिटास केलेल्या गोलमुळे एफसी गोवाने आघाडी घेतली आणि ती शेवटपर्यंत टिकवली.

गटातील पहिल्या सामन्यात त्यांनी श्रीनिदी डेक्कन एफसीवर 3-0 फरकाने मात केली होती. एफसी गोवाचे आता सहा गुण झाले आहेत.

आरएफडीएल स्पर्धेची गोवा विभागीय फेरी आणि आता मुख्य फेरी मिळून एफसी गोवा संघ सलग 12 सामने अपराजित आहे. यामध्ये दहा विजय व दोन बरोबरींचा समावेश आहे. त्यांचा स्पर्धेतील पुढील सामना दोन मे रोजी लिफ्फा त्रिवेंद्रम संघाविरुद्ध बंगळूर येथे खेळला जाईल.