गोवा विधानसभेचे अध्यक्ष रमेश तवडकर यांनी मंगळवारी गोवा फॉरवर्ड पक्षाचे आमदार विजय सरदेसाई यांनी माफी मागावी, अशी मागणी केली. जोपर्यंत सरदेसाई आपल्या वक्तव्याबद्दल माफी मागणार नाहीत तोपर्यंत मी विरोधी पक्षाच्या सदस्यांना भेटणार नाही, अशी भूमिका सभापती तवडकर यांनी घेतली होती. दरम्यान, दोन दिवसांच्या कालावधीनंतर आमदार विजय सरदेसाई यांनी तवडकर यांची माफी मागितली आहे.

गोवा विधानसभेचे हिवाळी अधिवेशन येत्या 16 ते 19 जानेवारी दरम्यान होणार आहे. आगामी अधिवेशनात खासगी सदस्य दिनाचा समावेश करावा, अशी मागणी सरदेसाई यांनी सोमवारी सभापतींकडे केली होती. यावेळी पत्रकारांना माहिती देताना सरदेसाई यांनी, सभापती हे मुख्यमंत्र्यांच्या कामगारासारखे वागत आहेत. अशी टीका केली होती.

विजय सरदेसाई यांची माफी

आपण सभापती तवडकरांचा अपमान केलेला नाही. एखादे वक्तव्य वाईट अथवा अपमानास्पद वाटले असल्यास मी माफी मागतो. सभापतींनी विरोधी अमदारांचे हक्क जपून अधिकवेशन वेळ वाढवून लोकांचे प्रश्न मांडण्याची संधी द्यावी.

दरम्यान, विरोधी पक्षनेते युरी आलेमाव, गोवा फॉरवर्ड पक्षाचे आमदार विजय सरदेसाई आणि इतर विरोधी आमदारांनी पत्रकार परिषद घेऊन आपली भूमिका मांडली होती. सभापती तवडकर हे दुटप्पी भुमिका घेत आहेत. सरकारने जरी कामकाजाचे दिवस ठरवले असले तरी सभापती खासगी सदस्यांसाठी दिवस देऊ शकतात. सभापतींना तेवढे अधिकार असतात. सभापतींनी जर अधिवेशनाचा कालावधी 15 दिवसांनी वाढवला तर मी केलेल्या वक्तव्याबद्दल त्यांची माफी मागतो, असे वक्तव्य सरदेसाईंनी केले होते.