Rachol By-Election: राशोल पंचायतीच्या प्रभाग एकसाठी झालेल्या पोट निवडणुकीत आज फातिमा कार्दोज यांचा विजय झाला. त्यांना 110 मते प्राप्त झाली तर त्यांचे प्रतिस्पर्धी उमेदवार केरोबिना गोम्स यांना 94 मते मिळाली.

फातिमा कार्दोज यांना सत्ताधारी गटाने पाठिंबा दिला होता. त्यांच्या या विजयाने पाच सदस्यांच्या या पंचायतीत सरपंच जोसेफ वाझ यांना आता पूर्ण बहुमत प्राप्त झाले आहे.

फातिमा कार्दोज या निवडून आल्यावर सरपंच वाझ यांनी त्यांचे अभिनंदन केले. त्यांच्या बरोबर उप सरपंच मिलाग्रिस फर्नांडीस व पंच सदस्य क्वितेरिया वाझ हे उपस्थीत होते. विरोधी उमेदवाराला निवडून आणण्यासाठी स्थानीक आमदार रेजिनाल्ड लॉरेन्स यांनी आपले बळ वापरले होते मात्र मतदार त्यांनी दाखविलेल्या अमिषाना बळी पडले नाहीत अशी प्रतिक्रीया सरपंच वाझ यांनी व्यक्त केली.