गोव्यात अपघाताच्या घटनांमध्ये मोठ्या प्रमाणात वाढ झाली आहे. हे प्रमाण 2022 च्या तुलनेत 2023 सुरू झाल्यापासून जास्त आहे. पोलिस यंत्रणा या वाढत्या अपघातांवर नियंत्रण आणण्यासाठी प्रयत्न करत आहे. दरम्यान आज राज्यात दुचाकीस्वारांचे दोन वेगवेगळे अपघात झाल्याची घटना समोर येत आहे.

मोले येथील राष्ट्रीय महामार्गावर दुचाकी व टेंपो यांच्यात अपघात झाला. तर गणेशपुरी मार्ना येथे खोदलेल्या खड्ड्यामुळे दुसरा अपघात झाला. या अपघातात दोघेही दुचाकीस्वार गंभीर जखमी झाले आहेत.

याबाबत अधिक माहिती अशी की, मोले येथील राष्ट्रीय महामार्गावरील धोकादायक वळणावर दुचाकी व टेंपो यांच्यात अपघाता झाला. अपघातात दुचाकीस्वार युवक गंभीर जखमी झाला असून मोठ्या प्रमाणात दुचाकीचे नुकसान झाले आहे. घटनेची माहिती मिळताच पोलिस व रुग्णवाहिका घटनास्थळी दाखल झाली.

गंभीर जखमी दुचाकीस्वाराला रुग्णवाहीकेतुन उपचारासाठी गोमेकॉत दाखल करण्यात आले. शॅनॉन अल्वारीस (21) असे जखमी युवकाचे नाव आहे. अपघाताचा कुळे पोलिसांनी पंचनामा केला आहे. कुळे पोलिस पुढील तपास करीत आहेत.

दुसरा अपघात हा शिवोली गणेशपुरी मार्ना रस्त्यावर खोदलेल्या खड्ड्यामुळे घडला. अपघातात दुचाकीस्वार ज्येष्ठ नागरिक गंभीर जखमी झाले आहेत. रस्ता खोदाईच्या कामाचा इशारा देणारे कोणतेही फलक ठेकेदाराने लावलेले नाहीत त्यामुळे अपघात घडत असल्याचा आरोप यावेळी उपस्थितांनी केला.