संजय पेटकर

Indian Super League इंडियन सुपर लीग (आयएसएल) फुटबॉल स्पर्धेची प्ले-ऑफ फेरी आणि सुपर कप स्पर्धेची उपांत्य फेरी गाठण्यास अपयश आलेल्या एफसी गोवा संघाने रविवारी मुख्य प्रशिक्षक कार्लोस पेनया, त्यांचे कोचिंग स्टाफ सहकारी गोर्का ॲझकोर्रा, एदुआर्द कार्रेरा व जोएल डोनेस यांना निरोप दिला.

आगामी मोसमात एफसी गोवा संघ नव्या प्रशिक्षकाच्या मार्गदर्शनाखाली खेळणार असून लवकरच नव्या प्रशिक्षकाची घोषणा अपेक्षित आहे.

हैदराबाद एफसीचे मानोलो मार्केझ यांच्याकडे एफसी गोवाची सूत्रे सोपविण्याची माहिती आहे. स्पेनच्या पेनया यांनी 2022-23 मोसमाच्या सुरवातीस एफसी गोवा संघाचे मुख्य प्रशिक्षकपद स्वीकारले होते. त्यापूर्वी ते संघातर्फे खेळाडू या नात्याने खेळले होते.

पेनया यांच्या मार्गदर्शनाखाली एफसी गोवा संघाला आयएसएल स्पर्धेत सातवा क्रमांक मिळाला, तर सुपर कप स्पर्धेत ते गट ‘क’मध्ये दुसऱ्या स्थानी राहिले.

एफसी गोवाचे फुटबॉल संचालक रवी पुस्कुर यांनी पेनया आणि त्यांच्या सपोर्ट स्टाफमधील सहकाऱ्यांना निरोप देताना भावी कारकिर्दीसाठी सुयश चिंतिले.

त्यांनी संघाचा विकास व प्रगतीसाठी समर्पित भावनेने खूप मेहनत घेतली, पण अपेक्षित निकालांची साथ लाभली नाही, असे रवी यांनी नमूद केले.