फोंडा: गेले दोन महिने आटोक्‍यात असलेला फोंडा तालुक्‍यातील कोरोनाबाधितांचा आकडा आता वाढू लागला असून हिवाळ्याची सुरवात आणि पर्यटकांची वाढलेली संख्या यामुळे राज्यभरातील कोरोनाग्रस्तांच्या या वाढू लागलेल्या आकड्यावरून भीती व्यक्त करण्यात येत आहे. कोरोना रुग्ण वाढीच्या पार्श्‍वभूमीवर आज (शुक्रवारी) कवळे येथील प्रसिद्ध शांतादुर्गा मंदिर भाविकांसाठी बंद करण्यात आले. कवळे शांतादुर्गा मंदिर परिसरात सातजण कोरोनाबाधित सापडले असून मंदिरातील पाच सेवेकरी कोरोनाग्रस्त झाल्याने मंदिर व्यवस्थापनाने हा तातडीने निर्णय घेतला.

कवळे येथील मंदिराच्या सेवेकऱ्यांची व त्यांच्या कुटुंबियांची कोरोना तपासणी करण्यात आली असून अजून अहवाल येणे अपेक्षित आहे. कवळे शांतादुर्गा मंदिराला भेट देण्यासाठी चार दिवसांपूर्वी सात बसगाड्यांतून महाराष्ट्र व इतर राज्यातील पर्यटक आले होते, एवढ्या मोठ्या संख्येने आलेल्या या पर्यटकांमुळेच हा कोरोना पसरला असल्याचा अंदाज व्यक्त करण्यात येत आहे. 

फोंडा तालुक्‍यातील मंदिरे खुली झाली असली तरी काही मंदिरात मात्र अजूनही श्रीच्या मुखदर्शनाची सोय आहे. तर काही मंदिर व्यवस्थापनांनी कोरोनासंबंधीचे सर्व नियम व अटी पाळूनच देवदर्शनाला भाविकांना मुभा दिली आहे. मागच्या काळात रामनाथी येथील रामनाथ मंदिरातील सेवेकरी पुजारी कोरोनाग्रस्त झाल्याने हे मंदिर बंद ठेवण्यात आले होते. आता कवळेतील शांतादुर्गा मंदिर भाविकांसाठी बंद करण्यात आले आहे. दरम्यान, मंदिर व मंदिर परिसर पूर्णपणे सॅनिटाईझ करण्यात आला आहे.

आणखी वाचा:

• कोरोनामुळे फोंड्यात ५३ जणांचा बळी! -
• देशामध्ये कोरोना संसर्गाचे प्रमाण झपाट्याने वाढत असले तरी गोव्यात कोरोना नियंत्रणात -