जग इतके पुढे जाऊनही अद्याप असे काही लोक आहेत जे तंत्र-मंत्र आणि अंधश्रद्धा अशा गोष्टींमध्ये गुंतले आहेत. आणि या सगळ्यातूनच पुढे गुन्हेगारीला आमंत्रण मिळते. नुकत्याच हाती आलेल्या माहितीनुसार 14 वर्षीय अल्पवयीन मुलीवर बलात्कार केल्याप्रकरणी एका बनावट तांत्रिकाला कोलवाळ पोलिसांनी अटक केली आहे. (Fake Tantric Raped Minor in Goa)

म्हापसा उपविभागाचे एसडीपीओ जिवबा दळवी यांनी दिलेल्या माहितीनुसार, एका तांत्रिकाने मुलीला तिच्या आयुष्यातील सर्व इच्छा पूर्ण करण्याच्या बहाण्याने तिच्यावर बलात्कार केल्याची तक्रार प्राप्त झाली होती. FIR नोंदवल्यानंतर पोलिसांनी तात्काळ आरोपी रमाकांत नाईक (बनावट बाबा, वय - 50 वर्ष, कान्सा, थिवी, बार्देश) याला अटक केली आहे.

या सर्व प्रकरणात या तांत्रिकाशी अल्पवयीन मुलीच्या आईचे संगनमत असल्याचे आढळून आले. त्यानंतर आईलाही काल रात्री अटक करण्यात आली आहे. पोलिसांनी कलम 376 आयपीसी, पॉक्सो कायद्याचे कलम 4 आणि गोवा चिल्ड्रन ऍक्टचे कलम 8(2), 2003 अंतर्गत गुन्हा नोंदवला आहे. दोन्ही आरोपी सध्या पोलिस कोठडीत आहेत.