Mumbai Goa Highway: गणेशोत्सव काही दिवासांवर येऊन ठेपला आहे. गणेश चतुर्थीपूर्वी मुंबई गोवा महामार्गाची एक लेन सुरू करण्याचा वायदा महाराष्ट्र सरकारने केला आहे. त्या दृष्टीने महामार्गाचे काम जोमात सुरू आहे.

राज्याचे बांधकाम मंत्री रवींद्र चव्हाण यात जातीने लक्ष घालताना दिसत असून, कामाचा वारंवार आढावा घेत आहेत. कशेडी घाटातील बोगदा खुला केल्यानंतर आता महामार्गावर सुविधा केंद्राचे उद्धाटन करण्यात आले आहे.

'गणपतीसाठी कोकणात जाणाऱ्या गणेशभक्तांना आणि वाहन चालकांना अल्पोपहाराची सुविधा मिळावी, त्याचप्रमाणे प्रवाशांना शौचालयाची व्यवस्था व्हावी; या दृष्टीने सार्वजनिक बांधकाम विभागाच्या वतीने मुंबई गोवा महामार्गावर विविध ठिकाणी सुविधा केंद्र सुरू करण्यात आलेली आहेत.'

'आज खारपाडा येथील सुविधा केंद्राचे उद्घाटन करण्यात आले असून, या सुविधा केंद्रावर प्रथमोपचार, शौचालय व्यवस्था आणि चहाचा स्टॉल अशा सुविधा आहेत. प्रवास लांबचा असल्याने मुंबई गोवा महामार्गावर खारपाड्यापासून दर पंधरा किलो मीटरवर अशा प्रकारची सुविधा केंद्र सुरू करण्यात आलेली आहे.'

'यामुळे कोकणवासीयांचा प्रवास तर सुखकर होईलच, त्याचबरोबर या सुविधा केंद्रांच्या माध्यमातून विविध सुविधा मिळतील.' असे बांधकाममंत्री रवींद्र चव्हाण यांनी म्हटले आहे.

दरम्यान, कशेडी बोगद्यातील सिंगल लेनची वाहतूक सुरू करण्यात आली आहे. कशेडी ते पोलादपूर हा प्रवास अवघ्या 10 मिनिटात पार करता येईल आणि प्रवाशांचा बराच वेळ वाचेल. यंदा कोकणात जाणाऱ्या गणेशभक्तांनाही निश्चितच हा बोगदा सुरू झाल्यामुळे फायदा होईल. असे चव्हाण यांनी म्हटले आहे.

तसेच, महामार्गाचे उर्वरित कामदेखील लवकरच पूर्ण करून संपूर्ण मुंबई-गोवा महामार्ग प्रवाशांसाठी उपलब्ध होईल, असं आश्वासन चव्हाण यांनी दिले आहे.