Tourist Attacked in Calangute Goa: आंतरराष्ट्रीय स्तरावर पर्यटन स्थळ म्हणून गोवा प्रसिध्द आहे. गोवा फिरण्यासाठी पर्यटक येत असतात. याच पर्यटकांवर राज्यात हल्ला होण्याचे प्रकार वाढताना दिसत आहेत.

दिल्लीतील पर्यटकावर चाकू हल्ल्याचे प्रकरण, गाडीला ओव्हरटेक केले म्हणून महाराष्ट्रातील पर्यटकावर हल्ला अशी पर्यटकांवर हल्ल्याची प्रकरणे समोर आली आहेत.

दरम्यान पर्यटकांवर हल्ला झाल्याची नवी घटना आज समोर आली आहे. कळंगुटमधील एका हॉटेलमध्ये पर्यटकांवर हा हल्ला करण्यात आला. यावेळी हल्लेखोर पर्यटकांचे मोबाईल फोन हिसकावून पसार झाले. याप्रकरणी कळंगुट पोलिसांनी तिघा संशयितांना अटक केली आहे.

याबाबत अधिक माहिती अशी की, केरळ येथील पर्यटक पर्यटनासाठी गोव्यात आले होते. ते हॉटेलमधील त्यांच्या खोलीकडे जात असताना ओशॅनिक शॅक बार्देश येथे जवळ पोहोचले असता चोरी करण्याच्या तयारीत असलेल्या तिघा संशयितांनी फिर्यादी व त्याच्या मित्रांना मारहाण केली.

या मारहाणीत ते जखमी झाले. यावेळी संशयितांनी फिर्यादी व त्याच्या 3 मित्रांचे अंदाजे 1 लाख 80 हजार रुपयांचे मोबाईल फोन हिसकावून नेले. याबाबतची तक्रार पर्यटकाने कळंगुट पोलिसांत दाखल केली.

तक्रारीची दखल घेत कळंगुट पोलिसांनी संशयितांचा शोध घेण्यास सुरुवात केली. कोणत्याही सुगाव्याशिवाय आरोपींचा शोध घेणे आव्हान होते परंतु, माहिती मिळविण्यासाठी विशेष पथके स्थापन करण्यात आल्याने आरोपींना पणजीमध्ये अटक करण्यात यश आले.

श्रीनिवास लमाणी (23), शिव लमाणी (22), अखिलेश चव्हाण(19) तिघेही मूळ रा. कर्नाटक अशी अटक करण्यात आलेल्या संशयित आरोपींची नावे आहेत. चौकशीत संशयितांनी फिर्यादी पर्यटकांचे मोबाईल हिसकावून घेतल्याची कबुली दिली. पोलिस पुढील तपास करीत आहेत.