Panaji Hit And Run Case: राज्याची राजधानी पणजीत शनिवारी पहाटे हिट ॲण्ड रन प्रकरण घडले असून, यात केरळ येथील अभियंत्याचा मृत्यू झाला आहे. मेरशी सर्कल हिरा पेट्रोल पंपाजवळ शनिवारी पहाटे तीनच्या सुमारस ही घटना घडली.

मनोज नटराजन शशीधरन (वय 39, रा. मेरशी, मूळ केरळ) असे या अपघातात मृत्यू झालेल्या अभियंत्याचे नाव आहे. मनोजच्या कुटुंबीय आणि मित्रपरिवाराने या घटनेत घातपाताचा संशय व्यक्त केला आहे.

मिळालेल्या माहितीनुसार, मनोज शशीधरन याला राष्ट्रीय महामार्गावर मेरशी सर्कल जवळ अज्ञात वाहनाने धडक दिली. या धडकेत शशीधरन गंभीर जखमी झाला. दरम्यान, त्याला 108 रूग्णवाहिकेद्वारे गोमकॉत दाखल करण्यात आले मात्र, त्याला मृत घोषित करण्यात आले.

जवळ आले होते बहिणीचे लग्न

मृत मनोज शशीधरन मेकॅनिकल इंजिनिअर आहे. त्याचे वडील बांधकाम कंत्राटदार आहेत. दरम्यान, शशीधरन याच्या बहिणीचे 30 एप्रिल रोजी लग्न असून, लग्नाच्या तयारीत तो गुंतला होता. त्याचे आई-वडील देखील याचसाठी मूळ गावी (केरळ) येथे गेले होते.

अपघात की घातपात

मनोज त्याची सर्व वाहने घरी ठेऊन एवढ्या रात्री मेरशी येथे कसा आणि का पोहोचला? त्यामुळे त्याच्या घरच्यांनी या घटनेमागे घातपाताचा संशय व्यक्त केला आहे.

दरम्यान, याप्रकरणी भारतीय दंड संहिता कलम 279, 304 अ व मोटार वाहन कायदा कलम 134 (अ) (ब) अंतर्गत अज्ञात कार चालकाविरोधात सदोष मनुष्यवधाचा गुन्हा दाखल करण्यात आला आहे. पोलिस पुढील तपास करत आहेत.

स्मार्ट सिटीतील सीसीटीव्ही बंद

पहाटेच्यावेळी झालेल्या या अपघाताची माहिती या परिसरातील सीसीटीव्ही बंद असल्याने मिळवण्यात अडचण येत आहे.