Ashwem Mandrem Ajoba Devasthan Land Issue: उत्तर गोव्यातील आश्वे-मांद्रे येथील श्री आजोबा देवस्थान मंदिराच्या जमिनीचा वाद गेल्या तीन वर्षांपासून सुरू होता. त्या वादाला आता पूर्णविराम मिळाला आहे. या जमिनीचे मालक आणि खरेदीदार यांनी 2024 चौरस मीटर जागा देवस्थानला दान केली आहे.

मूळ मालकाने जेव्हा ही जमिन विकली तेव्हा या जमिनीमध्ये या मंदिराचाही समावेश होता. देवस्थान समितीच्या ही गोष्ट लक्षात आल्यानंतर त्यांनी या विरोधात संघर्ष करायला सुरवात केली होती.

याबाबत मत व्यक्त करताना ग्रामस्थांनी म्हटले आहे की, तीन वर्षांच्या संघर्षाला पूर्णविराम मिळाला आहे. तीन वर्षे या जमिनीसाठी झगडत आहोत. तीन वर्षांपुर्वी ही जमिन विकली गेली होती. त्यात मंदिरदेखील होते. पण संपुर्ण गावकऱ्यांनी या विरोधात लढा दिला. आज त्याचे फळ मिळाले आहे.

या जमिनीच्या खरेदीचा जेव्हा व्यवहार झाला होता तेव्हा त्या खरेदीखतात या मंदिराचाही समावेश होता. पण हे मंदीर हे गावकऱ्यांसाठी जिव्हाळ्याचा विषय होता. त्यानंतर मंदिर व्यवस्थापनाने संबंधित खरेदीदाराकडे देवस्थानला ही जमिन देण्याबाबत मागणी केली होती.

त्यावर बोलणी सुरू होती. या जमिनीच्या मालकाने मंदिराची 2024 चौरस मीटर जमीन मंदिरासाठी दान केली आहे. त्याची सरकार दफ्तरी पुढील नोंदणी पुढील महिन्याभरात करण्यात येणार आहे. देवस्थान समितीने हा विषय लावून धरला आणि ही जमिन देवस्थानच्या ताब्यात घेतली.

जमिन विकणारे आणि विकत घेणाऱ्या अशा दोघांनीही मंदिर समितीसमोर ही जमिन देवस्थानला दान देत असल्याचे सांगितले. तसा मसुदा त्यांनी समितीकडे सुपूर्द केला. त्यामुळे हा प्रश्न आता मिटल्याचे बोलले जात आहे.