मडगाव : मडगावजवळील बाणावलीमध्ये नागरिकांसमोर एक नवीन संकट उभं ठाकलं आहे. विजेच्या खांबावरील विद्युतभारित तारांमुळे स्थानिकांचा जीव धोक्यात आला आहे. खांबावरील बहुतांश तारा या उघड्या असून विद्युतभारित असल्याने त्यांच्या संपर्कात आल्यास मोठी दुर्घटना घडण्याची भीती व्यक्त केली जात आहे.

बाणावलीमध्ये (Benaulim) अनेक ठिकाणी विजेच्या खांबांवर विद्युतभारित तारांचा गुंता झाल्याचं चित्र आहे. या गुंतलेल्या उघड्या तारा घरांपासून अगदी जवळ असल्याने स्थानिकांमध्ये भीतीचं वातावरण आहे. या तारांच्या संपर्कात एखादी व्यक्ती आल्यास दुर्घटना होण्याची शक्यता आहेत. तसंच तारांमध्ये घर्षण होऊन शॉर्टसर्किट होण्याचाही धोका असल्याने चिंता व्यक्त केली जात आहे.

विद्युतभारित उघड्या तारांसोबतच फोनच्या केबल, टीव्हीच्या (TV) केबल आणि अशा तारांचा गुंता झाल्याने मोठ्या दुर्घटनेची भीती आहे. शॉर्टसर्किट झाल्यास आसपासच्या घरांना याचा मोठा धोका आहे. गोव्याच्या (Goa) मास्टरप्लाननुसार विजेच्या तारा या भूमिगत असाव्या असणं गरजेचं आहे. मात्र बाणावलीत मात्र या तारा उघड्या आणि विजेच्या खांबावर असल्याने धोका वाढला आहे. वीज खात्याने या तारांचा बंदोबस्त करण्याची मागणी परिसरातून होताना दिसत आहे.