Goa News: मडगाव पालिका मंडळाची आज खास बैठक झाली. या बैठकीत स्थायी व विषय या दोन वैधानिक समित्यांची निवड एकमताने करण्यात आली. त्यामुळे निवडणूक झाल्यास जे क्लिष्ट नियम पाळावे लागले असते, ते टळले.

स्थायी समितीसाठी डॉ. रोनिता आजगावकर, स्वेता लोटलीकर, लता पेडणेकर, मिलाग्रीनो गोम्स, जोन्स फ्रान्सिस आग्नेल आणि निमिषा फालेरो यांची निवड करण्यात आली. वितोरिना तावारीस यांचा अर्ज तांत्रिक कारणामुळे फेटाळण्यात आला. नगराध्यक्ष दामोदर शिरोडकर आणि उपनगराध्यक्ष दीपाली सावळ हे या समितीचे पदसिद्ध सदस्य आहेत.

विषय समितीसाठी चार सदस्यांची निवड करणे भाग होते. मात्र, पाच अर्ज आल्याने नगराध्यक्षांनी एक अर्ज मागे घेण्यास 15 मिनिटांचा अवधी दिला. तेराव्या मिनिटाला दामोदर वरक यांनी आपला अर्ज मागे घेतला.

किचकट कायदे सुटसुटीत करा!

पालिकेतील समिती निवडणूक प्रक्रियेसारखे किचकट कायदे सरकारने सुटसुटीत करावेत अशी मागणी नगरसेवक घन:श्याम शिरोडकर यांनी पत्रकारांशी संवाद साधताना केली. नगराध्यक्ष निवड प्रक्रिया हात दाखवून करण्यासारखे कायदे दुरुस्त करून आमदार कामत आपण यात किती माहीर आहोत, हे दाखवून दिले आहे. त्यांनी इतर क्लिष्ट कायद्यांतही दुरुस्त्या आणाव्यात, असेही शिरोडकर म्हणाले.

सहा दिवसांत 15 लाखांची वसुली

नगरपालिकेला विविध मार्गांनी कित्येक कोटी रुपये येणे बाकी आहेत. गेल्या सहा दिवसांत 17 लाख रुपयांची वसुली केल्याचे नगराध्यक्ष शिरोडकर यांनी सांगितले. सुमारे 40 टक्के व्यापारी संकुलांकडे परवानाच नाही. त्यांचीही चौकशी सुरू असल्याचे नगराध्यक्षांनी सांगितले.

कचरा कंत्राटदाराला मुदतवाढ अयोग्य

नगरसेवक घन:श्याम शिरोडकर म्हणाले की, मडगावात कचरा गोळा करणाऱ्या कंत्राटदाराला मुदतवाढ करून देणे योग्य नव्हे. जेव्हा पालिकेला त्याची मुदत तीन महिन्यांनी संपणार आहे, हे माहीत असतानाही संबंधित अधिकाऱ्यांनी काहीच हालचाल केली नाही.