Fish In Goa: मच्छीमार खाते सेंट इस्टेव्ह येथील प्रायोगिक तत्त्वावरील प्रकल्पात चणक मत्स्य उत्पादन करण्यासाठी सर्वतोपरी प्रयत्न करत आहे. चणक माशांच्या प्रजातीला गोव्यात जास्त मागणी आहे, त्यामुळे चणकच्या उत्पादनाचा लोकांना फायदा होऊ शकतो असे मत्स्य विभागातील सूत्रांनी सांगितले.

राज्यात अनेकांनी पंतप्रधान मत्स्य संपदा योजनेचा लाभ घेतला आहे. या अंतर्गत उद्योजक आणि लोकांना विविध प्रजातींची मत्स्यशेती करण्यास प्रोत्साहित केले जाते. या योजनेच्या लाभार्थ्यांना पिंजरे आणि बायोफ्लोक प्रदान केले जातात.

आतापर्यंत 42 हून अधिक नदी पिंजरे आणि बायोफ्लोक प्रदान केले आहेत कुडतरी, सेंट एस्टेव, आखाडा, गावंडळी, नावेली आणि चिंचोणे गावातील काही लोकांना मत्स्य विभागाकडून बायोफ्लॉक मिळाले आहे.

बायोफ्लॉक पुरवण्याचे मुख्य उद्दिष्ट म्हणजे माशांना खाद्य खर्च कमी करणे हे आहे, अशी माहिती मच्छीमार खात्यातील सुत्रांनी दिली. मत्स्यव्यवसाय विभागाने सेंट एस्टेव्ह येथील प्रकल्पात १० सेंटीमीटर चणक मासे सोडले आहेत. यात २ पिंजरे असून प्रत्येक पिंजऱ्यात ३०० चणक सोडली आहेत.

आम्ही या माशांचे मत्स्यपालन करत आहोत. पुढील ६ ते ७ महिन्यांत चणक मासे १ ते २ किलोग्रॅमपर्यंत वाढतील अशी अपेक्षा आहे.  ओल्ड गोवा फार्म येथील मत्स्यव्यवसाय विभागाचे कर्मचारी या प्रकल्पाची देखरेख करत आहेत.