Panaji News: गोव्यात थैमान घालत असलेल्या नोकरी घोटाळा प्रकरणात आता ईडीने लक्ष घातले असून प्रिव्हेन्शन ऑफ मनी लाँडरिंग कायद्याच्या अंतर्गत गोव्यात तपासाला सुरुवात झाली आहे. नोकरी घोटाळ्याची चौकशी करण्यासाठी ईडीने अंमलबजावणी प्रकरण माहिती अहवाल तयार केला आहे.

आत्तापर्यंत सरकारी नोकरी घोटाळा प्रकरणात गोवा पोलिसांनी ३३ गुन्हे दाखल केले असून यांपैकी २० गुन्ह्यांची उत्तर गोवा तर बाकी १३ गुन्ह्यांची नोंद दक्षिण गोव्यातून झाली आहे. गोवा पोलिसांकडून मिळालेल्या माहितीनुसार सध्या ईडीचा कसून तपास सुरु झालाय.

गोव्यात वर्ष २०१४-१५ पासून पैसे घेऊन सरकारी नोकरी देण्याचे फसवे प्रकार सुरु आहेत, यामध्ये आतपर्यंत महिलांचा सक्रिय सहभाग आढळून आला असून म्हार्दोळ पोलीस स्थानकात ऑक्टोबर महिन्यात पहिली तक्रार दाखल करण्यात आली होती.

पूजा नाईकच्या घोटाळ्यानंतर दीपश्री गावास, प्रिया यादव, श्रुती प्रभुगावकर, उमा पाटील यांच्याविरोधात गोव्याच्या विविध भागांमधून गुन्हे दाखल करण्यात आलेत.

पोलिसांनी दिलेल्या माहितीनुसार आत्तापर्यंत गोव्यातील जवळपास ३०० पेक्षा अधिकांना सरकारी नोकरी प्रकरणाचे अमिश दाखवून लाखो रुपयांचा गंडा घालयात आलाय. गोवा सरकारच्या सार्वजनिक बांधकाम, शिक्षण, वाहतूक, महसूल, पोलीस आणि आरोग्य अशा विविध विभागांमध्ये भरती करून देण्याचे आमिष दाखवून डिचोली, बार्देझ, काणकोण,फोंडा तालुक्यांमधून आरोपींना हुडकून काढण्यात आलंय. पैसे देऊन सरकारी नोकरी मिळवण्याच्या नादात अनेक सामान्य लोकंना चुना लागलाय.