Goa: गोव्याचे राज्यपाल पी. एस. श्रीधरन पिल्लई हे आज गोवा दौऱ्यावर आहेत. ते गोव्यातील अनेक ठिकाणी भेटी देत आहेत. यावेळी ते म्हणाले की, या ग्रामीण भागांचा शाश्वत विकास सुनिश्चित करण्यासाठी राज्याच्या गावांमध्ये इको-टूरिझमला प्रोत्साहन देणे आवश्यक आहे. त्यांच्या संपूर्ण गोवा यात्रेचा एक भाग म्हणून पिल्लई यांनी त्यांची पत्नी रीटा यांच्यासह शनिवारी सांगे (Sanguem) तालुक्यातील गावांना भेटी दिल्या आणि स्थानिकांशी संवाद साधला. पिल्लई यांनी या भागातील पंचायतीच्या सरपंच आणि पंच सदस्यांशी संवाद साधला, जिथे स्थानिकांनी राज्यपालांना सांगितले की त्यांना तीन पंचायत क्षेत्रातील अपुरा पाणीपुरवठ्याच्या समस्यांचा सामना करावा लागत आहे.

स्थानिकांनी सांगितले की गोव्यातील खाण (Mining) उद्योगाचे जलद पुनरुज्जीवन करणे आवश्यक आहे. कारण सांगे तालुक्यातील मोठी लोकसंख्या उत्पन्नासाठी या उद्योगावर अवलंबून आहे.

शिवोली (Siolim) धरण प्रकल्पाशी संबंधित पुनर्वसनाचा प्रश्न गेल्या 38 वर्षांपासून प्रलंबित असल्याचे राज्यपालांना सांगण्यात आले. लोकांनी त्यांच्या विद्यार्थ्यांना ऑनलाइन वर्गांना उपस्थित राहता यावे यासाठी चांगल्या कनेक्टिव्हिटीसाठी इंटरनेट सुविधा बसवण्याची मागणी केली. स्थानिक स्वराज्य संस्थांनी उपस्थित केलेल्या समस्यांचे त्वरित निराकरण करण्याचे आश्वासन पिल्लई यांनी दिले.

राज्यात नवे सरकार (Government) येताच सर्व मागण्या व समस्या संबंधित शासकीय विभागांकडे मांडण्यात येतील, असेही ते म्हणाले. गावांच्या शाश्वत वाढीसाठी इको-टूरिझम उपक्रम राबविण्याची गरज त्यांनी अधोरेखित केली.

दिवसभराच्या दौऱ्यादरम्यान, राज्यपालांनी रिव्होना येथील प्राचीन दगडी कोरीव कामांना भेट दिली, जिथे त्यांना रिव्होना येथे सापडलेल्या दगडी कोरीव कामांच्या ऐतिहासिकतेची महत्त्वाची माहिती देण्यात आली. असा वारसा जतन करण्याची गरजही स्थानिकांनी व्यक्त केली.

दगडी कोरीव कामाकडे जाणारा रस्ता बांधण्यात येणाऱ्या अडथळ्यांबद्दलही राज्यपालांना (Governor) स्थानिकांनी सांगितले आणि या जागेला राज्य पुरातत्व खात्याने आधीच मान्यता दिली असली तरी या जागेच्या संरक्षणाशी संबंधित समस्यांचे निराकरण करण्यासाठी त्यांनी हस्तक्षेप करण्याची विनंती केली.