मुरगाव: गोव्यात गेल्या दोन दिवसांपासून मुसळधार पाऊस कोसळत आहे. हवामान खात्याच्या वतीने दोन दिवसांसाठी राज्यात ऑरेंज अलर्ट जारी करण्यात आला आहे. अरबी समुद्रात निर्माण झालेल्या कमी दाबाच्या पट्ट्यामुळे मुरगाव बंदरावरील सर्व कामकाज स्थगित करण्यात आले आहे. पाण्यातील बार्जना सुरक्षित स्थळी जाण्याचे आदेश देण्यात आले आहेत.

मान्सूनपूर्व पावसाने गेल्या दोन दिवसांपासून गोव्याला झोडपून काढले आहे. पुढील दोन ते तीन दिवस देखील राज्यात मुसळधारेचा इशारा हवामान खात्याने दिला आहे. अरबी समुद्रात कामी दाबाचा पट्टा तयार झाला असून, खबरदारीचा उपाय म्हणून मुरगाव बंदरावरील सर्व कामकाज स्थगित करण्यात आले आहे. सर्व बार्जना सुरक्षित स्थळी जाण्याचे आदेश देण्यात आले आहेत. तसेच, बंदराला धोका पोहोचणार नाही यासाठी आवश्यक खबरदारी घेण्याची सूचना करण्यात आली आहे.

गोव्यातील दोन्ही जिल्ह्यात (उत्तर, दक्षिण) आज देखील (गुरुवारी) पावसाची शक्यता वर्तविण्यात आली आहे. पुढील तीन तासांत वादळी वाऱ्यासह मुसळधार पावसाचा अंदाज हवामान खात्याने व्यक्त केला आहे. या काळात ५० ते ६० किलो मीटर प्रतितास वेगाने वारे वाहण्याची शक्यता असून, हा वेग ७० किलो मीटर प्रतितास होण्याची शक्यता विभागाने व्यक्त केली आहे.

गोव्यात गेल्या २४ तासांत दाबोळी - १४२.२ मी.मी, मडगाव - १४० मी. मी, मुरगाव - १२४.२ मी. मी, धारबांदोडा येथे १२२.५ मी. मी पावसाची नोंद झाली. तर, केपे तालुक्यात १००.४ मी. मी पावसाची नोंद झालीय. राज्यात या संपूर्ण आठवड्यात पावसाची शक्यता असून, नागरिकांना सतर्क राहण्याची सूचना करण्यात आली आहे.